Aizawl: Health Minister Lalrinpuii chuan Mizoram Universal Health Care Scheme (MUHCS) zawmtu chhungkaw 2,92,849 an awm mek thu a sawi.
Thawhtanni khan Health Minister Lalrinpuii chuan MUHCS zawm thar private hospital – Nazareth Hospital, Chaltlang; Nazareth Hospital, Ramhlun North; Redeem Hospital, College veng leh Bazar Bungkawn-a Kidney 360° Superspeciality & Diagnostic Centre a tlawh.
Health minister chuan mipui hmakhua ngaia private hospital pathum leh Kidney 360°-ten ke an pen chhuak chu lawmawm a tih thu a sawi a. MUHCS zawm remchang ve rih lote pawh sorkar chuan a nghah reng thu leh engtiklai pawha sorkar a inhawn reng thu sawiin, “Sorkarin mi zawng zawng huapzo health care cashless-a a kalpui chu nasa zawka mipui tana rawngbawlna a ni a. Hetianga nasa zawka mipui rawngbawlna MUHCS kaltlanga a inhawng hi a lawmawm takzet a ni,” a ti.
MUHCS hi mi zawng zawng tana duan a nih thu sawiin Lalrinpuii chuan, “Hemi tihlawhtling tur hian sorkar hospital hrang hrangte theihtawpa thuam that chhoh mek a ni a. Heti chung hian sorkar hospital chauh chuan mipui min dawl zawh loh avangin private hospital-te an pawimawh em em a ni,” tiin, mipui rawngbawlna a ni tih hre chunga zawm zel turin private hospital-te a sawm.
Health minister sawi danin tun dinhmunah MUHCS zawmtu chhungkaw 2,92,849 an awm mek a. Chungte chu – ABPMJAY 2,19,002, sorkar hnathawk 55,470, pensioner 9,310 leh mipui 9,069 an awm mek a. Damlo bill chawlhkar tin pek chhuah niin June 24, 2025 thleng khan mi 12,917 hnenah Rs 15,12,17,890 pek chhuah thawh a ni.