AZL: All India Radio Announcer (Grade I) Lalhmerliani Fanai chu nimin zing dar 8:50 khan Greenwood Hospital-ah cancer natna avangin kum 71 mi niin a thi.
All India Radio-a aw mawi leh ngainatawm tak leh thupuan a thiam avanga a hun laia Zoram mipuite ngainat hlawh leh lar tak, Lalhmerliani Fanai hi kum 1975 atanga kum 2013 inkarah All India Radio-ah thawkin, announcer a ni thin. Mizoram atanga Announcer Grade – 1 awm chhun a ni.
Lalhmerliani Fanai ruang hi Khatla Bethel venga a laizawn, Lalrinawmi Fanai te inah lak a ni a, nimin tlai dar 3 khan vui liam a ni.