Olivier Giroud leh Los Angeles FC te chu an inbiak rem hnuah an inthathen a, June 30 atang hian French forward hian American club hi a chhuahsan ang.
Kum 38 mi, Giroud hian kum 2024 nipui lai khan Major League Soccer club LAFC hi a zawm a, inelna hrang hrangah goal nga a thun a. Regular season-ah vawi 16 an khelh hnuhnunah Giroud hian vawi nga chiah bul a tan ve a ni.
LAFC co-president leh General Manager John Thorrington chuan, “Olivier hi LAFC tana a khelh chhung khan professional dik tak a ni a. A khelhpuite tan entawn tlak takin a awm a, inngaihtlawmna te, chak duhna thinlung te a zirtir nasa hle,” a ti.
“Khelmual chhung leh pawnah pawh club chawimawitu a ni nasa hle a, club tana a thawh rah te kan hmuh hmaih lo a, lawmthu kan sawi a. Amah leh a nupui, Jennifer bakah an chhungkaw tan duhsakna kan hlan e,” a ti bawk.
Giroud hian LAFC chu a vawi khatna atan kum 2024 khan US Open Cup a lakpui a, amah hian goal a thun nghe nghe a, he inelnaah hian an vawi khat champion-na a ni.
“Club tantu zawng zawng, min ngainatute, ka teammate leh LAFC-a thawktute chungah nuam taka hun hmang theia min lo dawnsawn avangin lawmthu ka sawi. LAFC hlawhtlinnaa ka inhnamhnawih ve thei kha lawmawm ka ti a, season hmasaah trophy kan lak bakah Club World Cup kan khel zui a, kei leh ka chhungte tan chuan tawn hriat duhawm tak vek a ni,” tiin a sawi.
A vanglaiin Giroud hi a inkhel kual hnem ve ta hle a, Italy, Grance leh England-ah te khelin Montpellier, Arsenal, Chelsea leh AC Milan te a lo zawm tawh a. French striker hian nomawi lian 11 a lak tawh bakah club tana vawi 700 chuang khelhah goal 300 bawr vel a thun tawh a ni.
France ram tana goal thun hnem ber niin goal 57 a thun tawh a. 2018 FIFA World Cup leh 2021 UEFA Nations League te a lakpui bakah 2016 UEFA European Championship leh 2022 FIFA World Cup final te a lo luhpui tawh bawk a ni.