Aizawl: Zawlnuam District Demand Committee (ZDDC) chuan Mamit district thendarha Zawlnuam distirct piantir a tul tawhzia chu Mizoram sorkarin hriatpui se an duh tih an sawi.
Thuchhuah an siamah ZDDC chuan, Chhim lam district khaw te reuh te te tamna tih lohah chuan Mamit district hi a lian fal em em a, inkalpawhna a that loh bawk avangin mipui tan thiltih a harsa em em a, veivah a hautak a, senso a sang a, mipuite tawrhna chhawk zangkhai turin Mamit district then darh a tul thu te, Hnahthial dist. pumpuia khaw awm zat -32 aiin Zawlnuam RD Block chauha khaw awm zat a tam zawk a, ZawInuam RD Block leh Kawrtethawveng RD Block belhkhawm hi tuna district thenkhat ai hian a len zawk thu te, Zawlnuam RD Block chhunga khaw engemawzat, Mamit hnaih lama awm te tan Zawlnuam RD Block dawr a harsat avangin Zawlnuam RD Block chu Zone I leh II ah then a ni a, Zone –II hi DRDO, Mamit atanga enkawl a ni. Hetiang bawk hian, Langkaih ruam leh Hachhek tlangdung tan Mamit dawr hi thil awlai lo tak a ni ve tho tih an sawi.
Zawlnuam RD Block (Zone-I) ah khaw 19 a awm a, Kawrtethawveng Block a khaw 21 nen, a vaiin khaw 40 hi Zawlnuam district a awm thei tur niin a lang a. Zawlnuam RD Block thensawm hnuah pawh, Kawrtethawveng RD Block nen chuan Hnahthial Dist. a khaw awm zat -32 leh Khawzawl Dist. a khaw awm zat -38 ai pawhin a la tam zawk dawn tho tih an tar lang.
ZDDC chuan state pathum inrinaa awm, khawthlang ruam, chawikan tulna leh ramri humhalhna atana a pawimawhzia te hriatthiampui a, an beiseina tihhlawhtlinsak ngei turin Mizoram sorkar an ngen tih an sawi bawk.