Aizawl: Samthang khuaa zikhlum chingtute an mangang a. State pawn atanga lut dan chahsak turin sorkar an ngen.
The Zozam Times thudawn danin, Champhai district huam chhunga awm Samthang khuaah hian kuminah chhungkaw 145-in zikhlum nuai 13 zet an phun a, quintal 10,500 vel thar beisei a. Mahse, an beisei aia hralhna an hmuh tlem avangin an mangang.
Tunlai hi an thar vanglai a ni a, Samthang khua pawhin chawlhkar khat chhungin vawi hnih an hralh chhuak thin a. Zikhlum chingtute hian chawlhkar khatah bag 4,000 an neih laiin hralh chhuahna an hriat loh avangin chawlhkar khatah bag 700 vel chauh hralhna an hmuh avangin an mangang takzet nia thudawn a ni.
Samthang khua hian kum tam tak zikhlum chingin ei an lo zawng thin a, kumin ang em em a hralhna harsa hi an la tawk ngailo niin a sawi bawk.
Zikhlum hralhna harsat chhan hi state pawn atanga zikhlum a luh tam lutuk vang nia sawi a ni a. State pawn atanga zikhlum lo lut hi dan chahsak turin sorkar an ngen.