Aizawl: ZPM General Headquarters Office Bearers chu nimin khan an president, Lalliansawta hovin Vana Pa Hall-ah an thukhawm a. Party chak zawka an kal zel dan tur leh Mizoram sorkar hmalaknate thlir hovin, resolution panga an pawm.
Thutkhawm kaihruaitu ZPM President Lalliansawta chuan hmalam panin an kal zel tih sawiin, “Vawiina kalkhawmte hi sorkar kan siam theih nana fatute, theihtawp chhuaha campaign te kan ni a, kan thawhrimna zawng zawngte a thlawn lo. Kuthnathawktuten a rah an tel a, sorkar hnathawkin a hun bi ah hlawh an la thei a, ram pumin kan tel mek a; chuvangin, in hlu hle a ni,” a ti.
Chief Minister Lalduhoma chuan an danglam a tul a, an kal danah fel lo lai leh tha lo lai a awm a nih pawhin inzir zel tur leh thiam zel tura beisei an ni tih sawiin, “Sorkar hnathawkte nen rim taka thawkin, ram siamtha turin theihtawp kan chhuah a ni,” a ti.
Home Minister K Sapdanga pawhin sorkar hna lakah a thiam leh a titha apiang lak a nih thu leh transfer-posting pawh uluk taka kalpui a nih thu a sawi.
PWD Minister Vanlalhlana pawhin thu sawiin, “Harsatna hrang hrang karah theihtawp chhuahin Mizoram kawngpuite tha taka siam tum a ni a, khawpui tawt lutuk tihziaawm dante pawh ngaihtuah a ni. Kawngpui eng emaw zat MoRTH kuta a awm chungin, mipui tawrhna tiziaawm turin sorkarin mawh a la a ni,” a ti bawk.
Thutkhawmah hian resolution panga an pawm.
- ZPM OB meeting resolution:
- December 2023-a ZPM kaihhruai Mizoram sorkar thar siam a nih atangin, kan ram leh hnam hmasawnna atana sorkar hmalakna te hi chhuanawm kan ti a, ZPM General Headquarters chuan kan thlawp tlat a ni.
- Kuthnathawktute thawhrimna hre reng a, ZPM kaihhruai Mizoram sorkarin a intiam ang ngeia thlai thar hlawhtling taka a lei leh loneituten an kutkawih ngei thawhrim rah an seng thei ta te hi kan lawmpui takzet a. Kum lo kal zel tur atana thlai thar lei dan tur ruahman tha zawk siam a ni zel te hi lawmawm kan ti takzet.
- ZPM kaihhruai Mizoram sorkarin mipuite hriselna dinhmun ngaihtuah a, an hmakhua ngai taka pawisa pek lawk ngai lo (cashless) a damlo enkawlna – Mipui Health Care (Mizoram Universal Health Care Scheme) tha tak a duang chhuak leh hman tangkai mek a nih bakah, a hlawhtlinna hmel kan hmu chho zel hi lawmawm kan ti takzet a. Dinhmun harsa zawka ding ten sum leh paia harsatna an tawh avanga inenkawlna tha an dawn ve phak loh thinna te tunah chuan reh chho zelin, anmahni sum sen ngai lo a sorkarin a enkawl theih tak avanga inenkawlna tha zawk an dawng thei ta hi kan lawmpui takzet a ni.
- Sorkar tha zawk siam a nih theih nana hmalakna hrang hrang – aikal lak tihtawp, office hun vawn dik, mumal taka sorkar hnathawk hlawh leh bill pek chhuah a ni ta te, sorkar hna lak hrang hrangah party induhsak bikna awm lova dan anga lak thin a ni ta te hi lawmawm kan ti takzet a; heng te hian sorkar inrelbawlna mumal zawkin a kal chho zel a ni tih a tarlang a, dik tak leh tha taka kal zel turin Chief Minister Lalduhoma kaihhruai Mizoram sorkar duhsakna kan hlan.
- Eirukna lakah kan Minister leh MLA te vawiin thlenga hminghliau an la awm lo leh India rama eirukna tlem lamah Mizoram pahnihna hial kan ni thei hi lawmawm kan ti takzet a. Eiruk tlem berna state ni thei tura tan lak zel nise kan ti.