Tripura-a BJP kaihhruai tangruala an thawhpui lian, Tipra Motha Party chuan an thlawpna an hnukdawk mai thei niin an MLA pakhatin a sawi a. Hetih lai hian party chief Pradyot Debbarma erawh chuan MLA thil sawi hi a tak tak thleng tur a ni lo niin a sawi thung.
Inrinni khan TMP MLA Ranjit Debbarma-a chuan Manik Saha-a sorkar chuan Tiprasa (Tribal) Accord a takin a hmang thei lo va, dan lova an state-a Bangladesh atanga lut an titawp thei lo bawk niin a sawi a. Heng thil pahnih hi BJP an thlawpna tura an intiamna niin a sawi.
Kum 2024 khan sorkar laipui, Tripura sorkar leh TMP chuan accord hi ziakin an state-a ram leilung fate chu politics, economy, culture leh ram neihnaah humhim tura tih a ni a, politics-a an aiawh an neih theih zat pawh tihpun tur a ni bawk a. Tribal mipuite tan eibara chawikana an awm theih nan sum tam zawk dah pawh a tel bawk.
MLA Debbarma chuan an party chuan accord hi a taka hman turin ‘kum khat chuang an nghak tawh’ niin a sawi a, hmalakna engmah a awm lo niin a sawi a. “Sorkar tel reng hi engnge a hlawkna awm?” a ti.
MLA hian an party chief farnu, Tripura East Lok Sabha biala BJP leh TMP ten candidate intawma an daha MP-a tling zui ta, Kriti Devi Debbarma-i pawhin he thil avang bawkin ‘bân a hreh lo’ niin a sawi bawk.
Hetih lai hian TMP chief, lal thlah kal zel, Pradyot Debbarma chuan an MLA pakhat thil sawi chu rilru tawt tawngkam a nih theih thu leh an party chuan chief minister-in remchang a siamsak hun an la nghak tih a sawi thung.
“Kan MLA Ranjit Debbarma-a’n hetiang thu a sawi chhan hi ka hre lo va, ka la bia ang. Vawiin hian Chief Minister Manik Saha-a nen inbiain Tiprasa Accord ziah atangin thla 18 a liam tawh thu ka hrilh a. MLA Debbarma-a’n kan thlawpna kan hnukdawn dawn tih as awi a nih chuan eng emaw a rilru tawt avang a ni thei a, hei hi thingtlang lama himna awm tha lo lutuk a veiin a nghawng chhuah pawh a ni ang,” a ti.
“July 20 hian Union Home Minister Amit Shah-a hovin Delhi-ah Tiprasa Accord a taka kalpui dan tur sawiho a ni dawn a. Chief minister-in min tiam atang khan kan la nghak ta zel a ni,” a ti.
Seat 60 awmna Tripura Legislative Assembly-ah hian BJP hian MLA 32 neiin anmahniin an sorkar thei chiah chiah a. TMP-in 13 leh Indigenous People’s Front of Tripura (IPFT)-in pakhat hmangin an thlawhpui a. CPI(M)-in MLA 11 leh Congress-in pathum an nei ve bawk.