Arsenal chhuahsan fel chiah, Ghana midfielder Thomas Partey chu hmeichhe khuaikhem chungchangah thubuai paruk awrhtir a ni.
Partey hi kum 2021 leh 2022 vela thil thleng, hmeichhe pawngsual thubuai panga leh mipat hmeichhiatna hawi zawnga hmeichhe laka chetna thubuai pakhat an awrhtir niin London Metropolitan Police te chuan an sawi a. An puhna zawng zawngah a pha vek thung.
An puhnaah hian kum 2021 leh 2022 chhoah khan hmeichhe pathum lakah mawi lo takin a che a, pawngsual thubuai panga hi an awrhtir phah bakah mipat hmeichhiatna hawi zawnga hmeichhe laka vawi khat a chet vangin thubuai dang an awrhtir bawk a. August 5 hian London-a Westminster Magistrate Court-ah a inlan a ngai dawn a ni.
Kum 32 mi hi July, 2022 khan an lo man tawh a, a hming leh nihnate an thupsak a, hnu chhui zui chhung hian Arsenal tan a inkhelh chhunzawm reng tho a ni.
Partey hi hmeichhe pakhat chu vawi hnih pawngsual anga puh a nih bakah hmeichhe dang pakhat chu vawi thum a pawngsual niin an puh a, hmeichhe dang leh pakhat lakah mipat hmeichhiatna hawi zawnga mawi lo taka che angin an puh bawk.
Thuchhuah an siamah Partey ukil, Jenny Wiltshire chuan, “Thomas Partey chuan an puhna zawng zawng hi a pha vek a. Police pawh tha takin a thawhpui a, thuneitu dangte pawh kum thum chhung hnu an chhuinaah a puibawm tha hle a. Tunah hian a hmingchhiatna chin fel theihna hun tha a inhawng niin a ngai a ni,” a ti.
“Tunah chuan dan anga thil kalpui mek a nih avangin amah hi chuan engmah a sawi zui duh tawh lo,” a ti bawk.
Ghana midfielder hi Arsenal chuan kum 2020 khan Atletico Madrid atangin £ maktaduai 45.3-in an lei a, Thawhtanniah khan a contract a hman zawh tak avangin Emirates Stadium a chhuahsan a, khelhna a nei rih lo.
Arsenal-ah season nga hun a hmang hman a, season liam taah Premier League-ah vawi 35 khelin goal li a thun a, pahnihna a nihpui a. Champions League-ah pawh vawi 12 a khel a, semi final a luhpui a, Paris Saint-Germain an hneh lo.
Emirates Stadium a luhchilh hnuah Premier League-av vawi 130 a khel a, goal kua a thun a. Ghana aiawhin vawi 50 a inkhel tawh a, March thlaa World Cup qualification match a khelh kha ram tana a feh chhuah hnuhnun ber a ni.
Partey chungchangah Arsenal chuan thuchhuah siamin, “June 30-ah khan Thomas Partey chuan kan hnena contract a neih a hmang zo a, dan anga thil kalpui mek a nih avangin club chuan engmah sawi theih kan nei lo,” an ti.
Detective Superintendent Andy Furphy chuan, “Huaisen taka thil rawn sawi chhuak ngam hmeichhiate thlawp tlat hi kan tum a ni,” a ti.