Myanmar ramchhung buaina avangin vawiin thlengin silai a la puak a, nunau pawisawi lo leh tar chak lo tam tak mahni sahimna zawnga an tlanchhiat a tul a, India ramchhunga rawn raltlan an tam phah hle.
An ramchhung buaina hian reh lam a la pan theih miau loh avangin Mizoram pawhin raltlan tam tak kan mikhual a, Aizawl thlengin raltlan an rawn tam phah tawh hle bawk.
Hetiang hi kan dinhmun a nih laiin kartawp mai khan Chinland Defence Force (CDF) Hualngoram leh Chin National Defence Force (CDNF) te chu nasa takin an inkap vak mai a, Champhai district chhunga awm, ramri dep Zokhawthar khuaah raltlan an tam lehzual phah hle.
Anni pawl hnih hi sipai sorkar do tura pawl ding ve ve an ni a, an mi leh sate venghim tura indin an nih hmel viau laia hetia anmahni leh anmahni an inkap vak mai hi a pawi hle a, nunna chan an la awm zui bawk nen, tangrual thiam se a va tha em.
Remna man hi a tam a, remna hi a hlu a, chuvang chuan raldo inang tlang theuh theuh hi chu lo inremin, nunau pawisawi loten harsatna leh manganna an tawh lehzual loh nan inrem takin awm thei se la, raldo inang tlang han nei zawk mawlh teh se.