Aizawl: MNF NCC Tawnluia chuan MNF founder president Laldenga chu India ram mai ni lo, khawvela Mizo hnam pho langtu a nih thu sawiin, Zofate mai ni lovin, thangthar zelte hnam thinlung (nationalism) tuhtu a ni tih a sawi.
Nimina Mizo Hnam Run chhung inkhawmah minister hlui ni bawk, Tawnluia chuan Laldenga chu sawisela ngaihnep ngawt theih a nih loh thu sawiin, “Pu Denga hlutna hi kan hrechiang chho tulh tulh ang. Mizo hnam leh Mizoram a awm chhung chu, Pu Laldenga hming a daih tawh lo ang. Mi ropui tak a ni. Ram leh hnam tan ke a penna kawngah hian thangthar ten entawn tur tam tak kan nei a, India ram hruaitu lute paw’n an chhuan thu an sawi,” a ti.
India sorkar aiawhin Home Secretary, Mizoram sorkar (UT) aiawhin Chief Secretay, MNF aiawhin MNF President Laldenga ten remna thuthlungah an sign tih sawiin Tawnluia chuan, “Chu chuan he remna thuthlung hian India sorkar leh Mizo mipuite kan vaiin min huap vek a ni tih a lantir chiang hle a ni,” a ti a. Remna a lo awm theihna atan hian a bik takin Mizoram Kohhran Hruaitu Committee (MKHC) ten an thawk nasa hle tih a sawi.
Tawnluia chuan, “Remna thuthlunga point tam tak zingah ‘Mizoram chu state puitling, a bika inhung bikna dan (Article 371-G) neiin a lo awm ta a. Chu bakah chuan Mizoram chu sum chungchangah Special Category State a ni ang. ILP pawh Mizoram sorkar rawn hmasalo chuan India sorkarin a thiatin a tidanglam lo vang,’ tiin dah ngheh a ni,” a ti a. “Laldenga chuan, ‘he remna thuthlung hi India sorkar duh dan a ni lo va, kan duhthusam pawh a ni lo. He remna thuthlung atan hian lei rem rapin keini Mizoram mipuite hian kan ram ro kan rel ang a, chumi hnuah chuan kan hma lam kan pan dawn a ni. Chuvangin he thuthlung hi rahbi hmasa ber a ni chauh a ni,’ tiin a sawi,” a ti bawk.