Aizawl: Zo Re-Unification Organisation (ZORO) chuan Myanmar ram chhung Chin State-a Chin National Organisation (CNO) leh Hualngoram People’s Organisation (HPO) te chu inngaichang tawn tur leh boruak tipunlun zawnga hma la tawh lo turin a ngen.

Nimina thuchhuah an siama ZORO chuan, CNO leh HPO te inkara buaina chhuak leh inkahna, thisen inchhuahsakna hial a thleng chu pawi a tih thu leh, he buaina avanga pawi sawi lo nunau thlabar manganga sang tam tak an awm leh hmun him lam pana mahni in leh lo tlansan a ngai hial te chu pawi a tih thu an sawi.

ZORO chuan unau, thisena inzawm nunna inlaksak tuma ralthuam hial chelek a ni thin hi tha a tilo hle a, a phal lo va, tun hnuah hetianga unau inkara buaina chhuakah ralthuam chelek zawnga chet la tawh lo turin Zofa chi tinte a ngenin a hriattir nghal.

“Myanmar chhungah hian State Administration Council (SAC) sual sipai ral neiin thih leh dam karah nunphung pangngai tak pawh zawh thei lova an awm mek a, tanrual hun tak meuh meuh a nih laia keimahni leh keimahni kan lo inbeihna hian kan tan rah tha engmah a chhuah dawn lo va, SAC awpbehna hnuaia kan awmna nikhua tiseitu mai a ni dawn a ni,” tiin, CNO leh HPO chu inngaichang tawn tur leh boruak tipunlun zawnga hma la tawh lo tur leh unau inkara inremna a awm theihna turin a khirh zawng ni lo, a dam zawnga chin fel dan zawng hram hram turin ZORO chuan a ngen.

Raltlan pun phah

AZL: Mizoram ramri depa Mynamar ram chhunga Zohnahthlak sipai pawlte inkahna avangin Mizoramah raltlan an pung zel.

Champhai atanga The Zozam Times thudawn danin CDF leh CNDF te inkahna avangin nimin tlai thleng khan Zokhawthara sahimna zawnga tlan mi 3,618 chhinchhiah an ni.

Zokhawthar YMA ruahman angin raltlante hi chhungte belh tur nei chu an chhungte bel tura hriattir an ni a. Belh tur nei lote chu Zokhawthar YMA Hall-ah awmtir an ni.

Hetih lai hian Pathiannia Chin National Army (CNA)-in CNDF hmunpui, Camp Rihli an beih avangin Vaiphaiah pawh raltlan an luh belh.

Nimin tlai thleng khan chhinchhiah danin Vaphaiah raltlan mi 700 chuang an lut a. Hengte hi Saikhumphaiah Mizoram Police leh Vaphai khawtlang hruaituten an chhinchhiah a, an awmna tur an buaipui nghal.