Quality Education Humhalhna Kawng zawh || Sorkarin unqualified teacher-te bân tum

Mizo Students’ Union (MSU), General Headquarters buatsaihin nimin khan ‘Quality Education Humhalhna Kawng Zawh’ neih a ni a. Vana Pa Hall kawt atangin Higher & Technical Education Directorate pisa kawt thleng zawh a. Sorkar lamin dan anga hma laa ni nga chhunga unqualified teacher-te bân an tum thu an sawi avangin reolution siamin kawng zawh hi an titawp.

Kawng zawh programme hmasa hi Vana Pa Hall kawtah neih a ni a. He hunah hian MSU Gen. Secy Zodinsanga chuan kaihruaiin AGS Lalriatpuia chuan report a pe a. MSU President B. Lalkhawngaihzuala, Joint Hnampual President K Jerome leh GS ACCJSU Gen. Secy C Lalduhsaka ten thu an sawi.

Hun hnihna hi H&TE pisa kawtah hman a ni a. He hunah hian MSU Treasurer Lalrampanmawia chuan a kaihruai a, MSU Vice President Roluahpuia’n thu a sawi bawk.

MSU president chuan unqualified teacher-te chance a pe fo chu tha an tih loh thu a sawi a. Tuna an chance pek pawh hi nakumah chance an pe nawn leh lo ang tih a sawi theih loh tih sawiin, ram hruaituten central service tling tura zirlaite fuih reng chung si a, qualified lo zirtirtu an ruai reng chu hriatthiam harsa an tih thu a sawi a. MSU ngenna sorkarin a tihlawhtling lo a nih chuan a tawp thlenga na taka hmalak an tum thu a sawi.

Kawng zawh hun hnihna H&TE pisa kawta hman a nih lai hian sorkar aiawhte leh MSU lam aiawhte an inbia a. Sorkar chuan dan an zawm a ngaih thu leh MSU nawrna avanga showcause notice an pek mek avangin hemi chin fel hnu ni nga chhunga bân an tum thu an sawi avangin resolution siamin kawng zawh hi an titawp a ni.

• Resolution chu hetiang hian siam a ni:

1. Sorkarin heng assistant professors unqualified-te lakah dan ang taka bân an nih theih nana showcause notice ni 15 chhung an pe hi tha kan ti a, showcause notice hun chhung a liam atanga ni nga chhungin bân an nih tur thu an sawi hi kan ring tawk a, sorkar pawh an thutiama ding ngei turin kan ti.
2. Tun hnuah zirtirtu hna lak reng rengah qualified teacher-te chauh lak thin ni tawh rawh se.
3. Tuna asst professor qualify lote hi an aiawh asst professor tur qualify ngei a rang lamin la rawh se.