Zaithiam Rebecca Lallawmsangi leh rapper Nicky Lalchhankima aka Lil Kiki te chuan ‘a nuamah leh a hrehawmah pawh…’ tiin ‘tiam tlat e’ an ti ta.
Nimin chhun dar 1:30 khan Rebecca leh Lil Kiki te hi Bualpui Presbyterian Kohhran Hall-ah an inkutsuih a. Mizo zaithiam leh rapper te pahnih hi Zo rimawi khawvela a thiante pawhin an tawiawm tha hle.
Rebecca hian a sira amah dinpui turin a thiannu, Sangpuii Hlondo a thlang a. Lil Kiki hian Lalnuntluanga a hmang ve thung.
Lil Kiki hi thawmhnaw dum suit mawi takin a inthuam a, a kawr chung hnuaiah kawr var chei mawi nalh tak a inbel. Rebecca hi Mizo designer Tluangpuii Hmar-in a bik taka a design sak, a var hlang chei mawi a inbel ve thung.
Rebecca leh Lil Kiki te hian a rukin hun rei tak an inzui; mahse, an inkar an thup reng thei bik lo. Inngaihzawnna khawvela an chen dun hnuah pen khat pen dun lehin, kumin February thla khan Rebecca hmaah thingthiin Lil Kiki hian ‘tiam tlat e’ tihpui turin a sawm a. Rebecca pawhin a lo ‘yes’ zan a ni.
July ni 5, 2025 khan Falkland venga Thara Resort-ah Rebecca man hlanna neih fel a nih hnuah, nimin khan khawvel thara cheng dun turin an inkutsuih ta a ni.