Aizawl: MZP chuan thuchhuah siamin, Ministry of Tribal Affairs chuan, July 7, 2025 khan Financial Year 2023-24, 2024-25 chhunga scholarship la sem loh Rs 50,42,81,000 sanction order chhuah a ni a, zirlaiten a rang thei ang bera an dawn theih nan a tul angin hma a la chhunzawm zel dawn tih an sawi.
Nimina an thuchhuahah MZP chuan, scholarship chungchangah theihtawp chhuahin hma an la tih sawiin, larsap kaltlangin Ministry of Tribal Affairs lam hotute pawh lehkha pek tawh niin, Delhi-ah Ministry of Tribal Affairs lam hotute pawh MZP hruaitute chuan hmuin an zuk bawhzui tawh a, Lok Sabha MP Richard Vanlalhmangaiha pawh sawipuiin theihtawp a chhuah mek thu MZP hruaitute a hrilh hnu lawkah a hlawhtlinna hmel hmuh a ni chu lawmawm an tih thu an sawi.
MZP chuan zirlaite harsatna hria a theihtawp chhuah a, Post Matric Scholarship la dawng lo zirlai 5,000 chuang te tan theihtawp chhuah tute chungah zirlaite aiawhin lawmthu an sawi a. FY 2024-25 pawh a rang lama sem vat a nih theih nan a hma la nghal turin Mizoram Scholarship Board (MSB) hotute an ngen nghal tih an sawi bawk.