Aizawl: Central YMA committee sang, Central Executive Committee (CEC) meeting thukhawmin Mizoram Universal Health Care Scheme (MUHCS) leh tun hnaia Myanmara unau inhriatthiam lohna avanga inkahna chungchangte an rel.
Thawhtanni zana Central YMA President Lalhmachhuana kaihhruaia CEC meeting thukhawm chuan, MUHCS chungchanga mipuiin harsatna an tawhte sawiho niin, hun remchangah Mizoram sorkara thuneitute sawipui an rel a. Zirtawpni kalta khan Central YMA hruaitute hian Non-Government Hospital Association Mizoram (NGHAM) hruaitute an lo kawm tawh a ni.
CEC meeting chuan tunhnaia Myanmar ram chhung Chin Hills-a HPO leh CNDF unau inkara inhriatthiamlohna avanga inkahna thleng chu pawi a ti a. Central YMA ngenna anga HPO leh CNDF te inkara inkahna a tawp ta chu lawmawm tiin, inremna a awm theihna turin Burma Chin state chhunga pawl hrang hrangte rilru inhawng taka sawiho anih theih nan a ngaihtuahna seng turin a beisei a. He thil thleng avanga Mizorama raltlan engemaw zat an awm belh avangin buhfai leh ei tur te pek nise a ti.
Thurel zingah Mizorama kawngpui tha a neih theihna tura YMA leh PWD thawhhona chungchang pawh sawiho a ni bawk.