- Dr J.T.Vanlalngheta; Advocate, Writer’s LEXIS & LAW
The Aizawl Post July 4, 2025 phek hma lamah khan Mizoram Teachers Federation (MTF) thu relte zinga 9 tanlan a ni a, chungte chu:
- Sawrkar enkawl school-te Sawrkarin thuam thain ngaihtuah lehzual rawh se.
- Headmaster leh teacher selection Grade-a kum 10 awm tling tawhte tan upgradation/special grade siam ni rawh se.
- Academic Session hi January-December-in kal leh ni rawh se.
- Sawrkar school ram tun aia nada leh zualin humhalh ni rawh se.
- Sawrkar enkawl school-a commin uniform hman mêk hi schiol-in an duh anga kalpui leh ni rawh se.
- Zirtirtu post ruak tam lutuk hi rang takin Sawrkarin hnawh khat zel rawh se.
- MTF hian mizoram pum huapin ruihhlo do turin hna la rawh se
- School Education Deptt-a officer entry grade atana circle education officer lak hi tih tawp ni tawh rawh se.
- Sawrkar enkawl school-a thawktuten thahnem ngai lehzualin zirtir theuh ni rawh se.
Khing ro relte khi a tha hlawm khawp maia, a theih chen chen chu Sawrkar hian ngaihtuahsak se ka ti hle mai; chutih laiin an thu rel zinga an tih tur leh mawh phurhna hlawm lian ber, an FILE (main duties & responsibulities) ‘naupang zirtirna lam’ an thu rel zinga a hmasa bera dah lova a tawp bera an chantir erawh hi chuan ngaihtuahna a ti thui deuh: “Thinlunga khat liam chu kain a sawi chhuak thin a ni si a thin,” (Mathaia 13.34; Luka 6.45)” tia Lal Isua thu sawi ngaihtuah phei chuan thinlung taka a bing (intensively)-a zirlai naupangte hma sawnna (zirtirna) ngaihtuahna lam aia thil dang dah hmasa zawk anga puh palh theih an ni; The Aizawl Post hian an thu rel indawt dan ni lovin a rem thla zawk nge tih erawh chu keini ang chuan kan hre ve phak lo va. Tin, ni danga conference-ah naupangte dikna chanvo bîk, ‘hlawh nen inphua naupangte zirtir hi naupangte dikna chanvo a ni’ tih lam kha conference hmasa lamah an lo dah hmasa tawh thin pawh a ni maithei bawk (Chutiang a lo nih chuan a tha e). Vanglaini Chanchinbu 5.7.25 erawh chuan kan ziah lan tak zirl lai naupangte zirtirna chungchanga thu rel hi a hmasa berah a dah thung a. Hei erawh hi chuan min ti lawm a. Mahse, thahnem ngai lehzuala naupang zirtir tura an infuihna hi number khatna nge an dah number tawp bernaah tih hi zawhna a la ni fan e!
Tlem lai deuh khan Mizoram Sawrkar Deptt 30 atanga officer rual inzawm khawmna ‘The Mizoram Departmental Officers’ Association kal khawm chuan thupuiah ‘Loyalty to one’s duties and responsibilities’ tih an hmang a. A Mizo tawng chuan ‘ Mahni hnaa rinawm’ tihna a ni mai ang chu. MDOA member-te service condition that lohzia ngaihtuah chuan, service siam thatna lam hawi pawh ni lo, mahni hna thawh theuh tha zawk leh chak zawka thawh a nih theih dan tur leh tling zawka hna an thawh theuh theih nana inpumpekna lam hawi khûnkhân tak maia Assembly-a he thupui chauh tui tak maia an sawi ho thei kha fakawm tak an ni a, Service dangte entawn tlak (model) an lo ni tih min ngaihtuah chhuahtir a, khatianga Assembly thupui bera an nei kha theihnghilh theih loh ‘thu ropui’ a ni e.
Zirtirtute hi Mizoram Departmental Officers’ Association mite nen hian chhungkaw khat, hna thawh dang si kan ni; Saphoina ‘different species of the same genus’ an tih ang hi kan ni ber awm e; officer-a an kai san hunah MDOA-ah an rawn tel ve nghal thin a. Mizoram nghahfak, nakina ram hruaitu tur zirlai naupangte enkawla chher mek kan zirtirtute hi tluang zel mawlh rawh e.