Aizawl: Aizawl West II bialtu MLA Lalnghinglova Hmar chuan a bial chhung atanga Mizoram University hnuaia Under Graduate exam 2025-a Top 10-a langte lawmpuiin, pawisa fai Rs 10,000 theuh leh lawmpuina thuziak a hlan.
Nimin chawhnua a pisaa lawmpuina hun hmanah bialtu MLA Lalnghinglova, Minister of state chuan Aizawl West – II bial chhung atangin Top 10 a lang thei mi pakua an awm thei chu lawmawm a tih thu a sawi a. “Lehkha kan zir hian a sang tawlh tawlh a tihthat hi a pawimawh. A san poh leh kan tihthat a ngai a, chuvang chuan inthlahdah lova tan kan lak nasat chhunzawm a ngai,” tiin hlawhtlinna changte chu a fuih.
LESDE minister ni bawk, Lalnghinglova Hmar chuan, “Tunah hian a then chuan UG degree zawhah hian hna kan zawng ang. Civil Service exam-te kan tum ang, a then chuan uluk taka kum tam pawh inbuatsaih ngai lem lovin an tlang nghal mai thei. Amaherawhchu mi tam tak chu kan zirlai exam a ti tha si, khami mil hna zawn dawn a hlawhtlin theih loh a awm thin. Chuta pawimawh em em chu kan exam a kan zirna hi eizawnna a chantir a ni a. Chu chu kan nu leh pate pawhin an nghahhlelh ber a ni. Tuna mi hi chu a zawh khatna chauh a ni a, a bak thleng turin zir nasat lehzual a ngai dawn,” a ti bawk.