Aizawl: Land Revenue & Settlement Department (LRS) leh Labour, Employment, Skill Development and Entrepreneurship Department (LESDE) te chuan Industrial Training Institute (ITI) Aizawl-a surveyor course training thuam chaka tihchangtlunna kawnga thawhho dan tur an sawi ho.
Nilainia Secretariat Conference Hall-a thutkhawm hi LR&S Minister B. Lalchhanzova leh LESDE Minister Lalnghinglova Hmar ten an kaihruai.
LR&S minister B. Lalchhanzova chuan surveyor mamawhna a sanzia sawiin, empanelment of survey firms kalpui mekah pawh surveyor tha indaihlohna a nasa a, hemi bakah hian licensed surveyor an buaipui leh mek tih a sawi a. department pahnihin hmantlaka surveyor zirchhuak thalaite tan ramchhung leh pawnah eizawnna tam zawk hnathawh tur a inhawng zau zel dawn tih a sawi.
LESDE Minister Lalnghinglova Hmar chuan ITI Aizawl-a surveyor course chu uluk taka an zirchian hnuah tihchangtlun a tulzia hriain, hemi kawngah LR&S department te phungbawma sawm annih thu leh an rawtna te ngaipawimawha sawihona buatsaih ani ta chu lawmawm atih thu a sawi a. Department pahnih ten thalai te tana thiamna tak tak pek kawnga an thawkho tur chu thil pawimawh tak a nih thu a sawi bawk.
Thutkhawmah hian ITI atanga survey zirchhuak ten thiamna tha zawk an neih theih nante, hemi kawnga LR&S a surveyor leh technical officer te thiamna hman tangkai dan te, practical training tha zawk leh apprenticeship an neih theih nan te leh LR&S department surveyor ten refresher course te an kal theihna tur atana thawhho dan turte sawi ho a ni.
An thil relte chu hrualmuma Memorandum of Understanding sign vat anih theih nan, MoU drafting Committee an ruat a. Thawhhona thuthlung duan fel anih veleh a ranglama sign turin an rel a ni.