Pawl pali – Centre for Environment and Social Justice (CESJ), Mizoram First (MF), Citizen Alliance for truth & Social Justice (CATAJ) leh Mizoram Tranformation Movement (MTM) chuan Mizoramin kawng tha a neih theihna tura hma la turin Joint Civil Society of Mizoram (JCM) an din.
JCM hruaitu atan Convener-ah Dr Lalbiakmawia Ngente, Co-Convener-ah Lalram Mawia, Secretary-ah Dr Vanlalsiama Chhangte te an ruat nghal.
JCM hian an hmalakna hmasa tur puang nghalin, National Highway 306 &06 (Vairengte to Sairang) hi Mizoram nunna hnar, mamawh zawng zawng chawk luhna a nih avangin furpui hmain siamthat anih ngei theihna turin a mawhphurtute nawr zui zel an tum a. A bik takin Kawnpui leh Khamrang inkar (Package 7&8) alingment thar siam tura rawtna chungchangah hian sorkar laipui, Ministry of Road Transport & Highway hnenah alignment hlui zawk hi a thatna a tam zawka an hriat avangin rawtna thlen an tum.
National Highway 44A (Aizawl to Manu, Tripura), Tuidam leh Darlak inkar chhe lutuk leh chetsual hlauhawm tak hi siamthat thuai a nih theihna turin thuneitute hnenah thlen an rel a. Hemi kawng hi tunkarah JCM hruaituten a hmunah en an rel bawk.
JCM chuan Mizoram chhung kawngpui hrang hrang – National Highway, State Highway leh a dangte pawh hi a theih anga siamthat chhoh zel a nih an duh tih sawiin, khaw tin inkalpawhna kawngte pawh kawng tha tak siam vek turin he lama hma la thei tu Mizoram sorkar, NHIDCL, Mizoram PWD te bakah company leh contractor hrang hrangte pawh theihtawp chhuah zel turin an ngen tih an sawi.