- Dr. C. Lalrampana
A KAMKÊUNA
Mipui Sawrkar ZPM Ministry din hma zawng khan Mizoramah INC Central party leh Regional Party an inlehthaltawn deuh reng a. Khatih lai hun zawng khan Central lamah INC sawrkar leh BJP an inthlak ve fo bawk. Khatih hun laia MPCC lamte tan chhan ber chu Central party nih loh chuan development hrang hrangah hmasawnna a awm thei lo niin an sawi fo thin. Chuvangin, INC khan inhnem nan tak an hmang fo reng a nih kha! A dikna lai tam tak a awm tlat.
ENGATINGE BJP CHU?
Central sawrkarah BJP an lo lian a, term 3 deuhthaw India ram an kaihhruai ve ta mek. Mizoramah an Central party INC anpui Central Party BJP an han ding chho ve dek dek a, Hinduism hlauhawm tak angin an han insawithaih kual leh thin niin a lang. INC leh BJP hruaitute hi Hindu ve ve an ni a, an lêm chuang lo. chutih laiin INC hian an hmu Hindu ruih bik a nih hmel. Hetihlai hian tun din hmunah Central Party ni lo, pro-central Party pawh ni lo, ZPM tualto party fir hlang ngat Mizoramah sawrkar kan han hrawn ta mek a. Mahse, Central Party an nih loh vang nget Delhi drip doze sang zawk khai tur an hmu zo lo nge, kum hnih dawn thuneihna an chelh tawh chungin ram hmasawnna lian tham hmuh tur a vãng hle a. Pawisa lengvak lah a vâng a, kawngpui tha lah hmuh tur a vâng êm êm a, engkim hi a vãng ni berin a lang. Hetih lai hian HIV+; Cancer; smuggling; ruihhlo; ruihhlo ngai; rukruk, leh inbumnate erawh a tam êm êm lawi si hi thil mak tawp thang a ni. Central atanga Development fund hmuh that loh avanga eiruk mai tur awm si lo lai karah tanchhan remchangah hmangin eirukna laka an la fihlim vek thu te, insawimawi leh thiamthu chham phual vel mai maiin mipui tihlungawi an tum reng ni berin a lang.
Tichuan, Mizoramah BJP President thlan thar a lo ni a. July 3, 2025 khan Mizoram State President Dr K Beichhua chuan Larsap General Vijay Kumar Singh chu Raj Bhavan-ah a kawm a.
MLA Dr K Beichhua chuan Mizoram chu state pachhia leh hnufual tak a nih avangin Mizoramin kawng hrang hranga hmasawnna a neih theihna tura hmalakpui turin a sawm a, Mizoram mipuite ei leh bar zawnna kawnga harsa tak takte hma khua ngai a, Prime Minister Narendra Modi hmalakna chhun zawm a, “Sabka Saath Sabha Vikas” tih anga mi tinin an chanvo dik tak an chan theihna tur a hmalak puiah a sawm nghal a ni.
Larsap General Vijay Kumar Singh chuan Dr K Beichhua MLA, chu a rawt ang ngeia Mizoram hmasawnna tur atana theihtawp a chhuahpui tur thu a lo hrilh a, Mizorama PM Scheme hrang hrang kalpui a nih dan leh hmalak dan te pawh a tul anga enpui a, PM Scheme-te a hlawhtlin theih nan hmalak a tul thu leh hruikhat vuana thawh dun a tul thu a lo hrilh a nih kha!
KAWNGPUI CHHE LUTUK CHUNGCHANG:
State BJP thar hian thlan tlin a nih veleh Governor a hmuh bakah press mite a kawm a, tunah kawngpui chhia a vei zia lantir nan a takin a umzuileh nghal a, amah ngeiin kawngpui chhia a taka a hmuh dan a sawi chu tarlang ila:
“Kâwnpui leh Khamrang kawng chu NHIDCL-te nen inbiakna kan neih hnuah vawiin khan a hmunah kan zu kal a. Kawng dinhmun enin a lungchhiatthlak hle mai. Amaherawhchu, kan dilnate ngai pawimawhin NHIDCL hian Monday (07/07/2025) atanga hnathawk nghal turin hnathawh hmanruate an chhawp nghal a, a lawmawm hle mai. He kawng hi NHIDCL-te hian KM 77 changin, Mizoram PWD-te hian KM 40 chauh an chang thung a. Kan dilna angin, Monday atang chuan NHIDCL hian KM 40 pawh hi a kutah a dah dawn a ni. KM 40 chauh kawng pawh kan siam hlei thei lo hi chu a manganthlak takzet a ni. BJP Mizoram chuan kawng tha kan neih theih nan hma kan la zel dawn a, State sawrkar pawhin a tul chuan BJP hi inthlahrung loin min lo pun zel se, Mizoram tan kan awm reng dawn a ni tih ka sawi duh bawk e.”
Kawnpui-Sairang inkar kawng siam mekah NHDCIL-te’n an work progress nitin MBJP President an hrilh thin dawn tih a ni zui a, alawmawm hle. PWD Minister-in kawngpui chhia a tlawh ve aiin Central Party State BJP President kawngchhe tlawh hian awmzia a nei zawk hle tih chu thil chiangsa a ni a, a zahthlak rem rem hle mai! Oil man tihsan atanga chhiah tlingkhawm kawngpui chhe thawm nana vaibelchhe 23 chuang zette kha an eiru vek tawh nge, an divert kual vel ta zawk em ni let
A TLÂNGKAWMNA
INC an ni emaw, BJP an ni emaw, Central sawrkarah tu pawh sawrkar se tha taka thawhpui hi tualto party chuan a hlawkpui ber thin a ni. Tunah pawh ZPM Ministry hian BJP (NDA) hi zakder kawisawi vel lo hian kan ram tana tha tur ngaihtuahin ihe lovin zawm (affiliate) vat law law se a tifuh a ni mait Inthlan dawna an intiam anga sawi rik ZPM Ministry form hunah BJP tel ve tura sawite kha a tirah khan telh ni ta se chuan heti êm êm hian eiruk tur pawh awm lo khawpin kan state hi a khawro lo mai tur a. Sum leng vak vân nâkalaia kawngpui tha zawh tur vâng ta êm êm maite hi mipui sawrkara inngai hian mahni insawimawia thiamthu sawi sawi lo hian “Thu tiama hlen si loh ai chuan tiam loh law law hi i tan a tha zawk.” (Thuhriltu 5:5) tih thu hi ngaihtuah chiang nawnlehin inthlan lai vela an intiamnate kha a takin hlen mai se phat mar reng ai chuan ram mipuite kan hlim zawk ang. Hetiang renga mipui a kai hruai a nih chuan Central Party BJP emaw, INC bawk emaw, MNF leh tualto party dang hi kum 2028 inthlanpuiah sawrkar thar hmel a lo inlarleh nghal ngei ang tih hi hmuh lawk theih a ni e.