Aizawl: Aizawl district chhunga police station hrang hrangah kumin January atanga June thla chhungin thubuai 818 ziah luh a ni.
Nimin khan ni hnih awh tur Aizawl District Crime Review Meeting, 2025 chu SP, Aizawl Conference Hall-ah DIG (Northern Range) Ashok Malik, IPS-in a hawng a, vawiinah neih leh a ni ang.
Aizawl District Crime Review meeting-a tar lan a nih danin Aizawl district-a police station hrang hrangah January atanga June thla chhungin thubuai 818 ziah luh a ni. Hengah hioan in rawk leh rukrukna a tam ber a, za zela 65 a tling a. Rukruk thubuai za zel 14 hi lirthei ruk thubuai a ni bawk.
Thubuai ziah luh tawh zinga 107 chu court-in ching fel tawhin henga zaa 89-ah thil tisualtute thiam loh chantir an ni.
Kum 2025 chhungin ILP checking hi vawi 41 neih niin dan bawhchhia 195 mante chu thuneitute hnena hruai an ni.
Aizawl khawpui chhunga police station-te chuan Central Equipment Identity Register (CEIR) portal chu mobile phone bo chhuichhuah nan tangkai takin an hmang mek a. CEIR kaltlangin mobile phone bo 284 lai chhuichhuah niin, hengte hi mobile phone neitute hnenah hlan leh an ni.
Mobile phone chhuichhuah kawnga a ti tha ber Bawngkawn Police Station in CEIR kaltlangin mobile phone bo 143 chhuichhuak tawhin, a dawttu Aizawl Police Station mobile phone bo 104 an chhuichhuak tawh a ni.
Mobile phone bo chhuichhuah kawngah hian C/35 Ramengmawii, Bawngkawn Police Station hian a mi malin a thawhhlawk hle, a taimakna leh thawhrimna avangin thla li (4) chhung lekin mobile phone bo 120 a chhuichhuak a ni. A hna thawh that vangin nimin khan chawimawina reward hlan a ni bawk.
Dan bawhchhiatna leh suahsualna hrang hrang laka mipuite kan inven a kan him theih nan Aizawl District Police chuan theihtawp chhuahin hma a la a. Hmun hrang hrangah dan leh hrai inzirtirna a buatsaih thin a ni. Kum 2025 chhungin dan leh hrai chungchang inzirtirna vawi 24 buatsaih tawh niin, mi 4,895 hnenah zirtirna pek an ni.