Mizoram State BJP chuan larsap-in Governor Rule-a Chakma Autonomous District Council (CADC) a dah chungchanga Home Minister K Sapdanga’n a thutlukna a dem thu a sawi chu Mizorama thil la thleng ngai lo a nih thu leh politics-a inbeihna atana larsap an hmang chu an dem tih an sawi.
Ningani khan Aizawl Press Club-ah thu thar thehdarhtute kawmin BJP National Minority Morcha Secretary Delson Notlia, MDC chuan India Constitution Sixth Schedule hnuaia Autonomous District Council (ADC)-te chungah larsap chuan thuneihna sang tak an nei tih a sawi a. Sixth Schedule to the Constitution of India hnuaia hmarchhak state-a tribal-te mahnia inrelbawlna tur autonomous council 10 a din zingah CADC hi ADC dang ang lo takin an inthlak zing bik tih sawiin, “CADC rapthlakzia chu, sum leh pai enkawl kawngah felhlel a tam a, hei hian ei rukna nasa tak a awm tih a tilang chiang. Financial emergency puan a hun tawh,” a ti.
Delson Notlia chuan ei rukna a hluar avangin leh politics nghet lo a awm reng avangin CADC huam chhunga pawl lian pathumin an council chu khamawm an tih em avangin, June 12, 2025 khan larsap an hmu a, CADC tawp lutuk chhanchhuah a ngaihzia leh suspend chauh pawh duhtawk lovin enquiry commission dina ei rukna chhui chhuak turin memorandum an theh lut tih a sawi a. Chief minister pawh hmuin larsap hnena memorandum an theh luh ang chiah theh lutin an thlen a, theihtawp chhuahpui a lo tiam tih a sawi.
CADC-a tlawmngai pawl lian pathumte ngenna chu ngun taka a ngaihtuah hnuin larsap chuan a enkawlna hnuaiah CADC chu thla ruk chhung dah phawt a, an sawiselnate enfiah a, siam that ngaite siam thaa hna a thawh a duh avangin July 7, 2025 khan India danpuiin thuneihna a pek angin, Governor Rule-ah a dah tih sawiin Delson Notlia chuan, “Hei hi suspension chauh a ni, thla ruk chhung atan a kuta enkawl turin a dah mai a ni a, hemi chhung hian thil dik lo chhuia an sawiselnate enfiah turin a ti mai chauh a ni a. CADC thiat anga an sawi chu a dik lo a ni,” a ti.
BJP National Minority Morcha Secretary chuan democracy palzut anga ZPM leh home minister-in larsap an demna thu an sawi chu larsapte hi politics-a hnuk luh hi thil tha pawh a ni lo tih sawiin, “Larsapin dan hnuaiah a thuneihna a lekkawh demna hi a thlen vawi khatna a ni,” a ti bawk.
December, 2024 khan CADC-ah BJP-in sorkarna a siam dawn khan larsapin chief minister leh council of ministers a rawn tih sawiin, “Democracy palzut a nih lohzia chu, thla ruk/sarih kalta khan ZPM hian CADC tawpzia an hria a, thiat tura an duh thu thlenin Governor Rule-a dah turin an lo ngen tawh a. Kum khat pawh a ral hmaa CADC-a ZPM an sorkartir duh avanga an thu an thlak leh ta mai hi mak kan tiin, ZPM hian ei ruknaa inhnamhnawihte humhima rorelna khawla dah luih tlat an tum ta mai hi an party-in thu an aupui thin nen a inhmeh lo hleah kan ngai,” a ti.
CADC-ah ZPM-in sorkar siam thei dinhmuna an din veleha Governor Rule-a CADC dah tura larsap thutlukna dem a, home minister leh ZPM party thuchhuahin larsap thutlukna mipui rorelna palzutna nia an puh leh larsap chu politics-a inbeihna atana an hmang chu BJP Mizoram-in an dem thu Delson Notlia chuan a sawi a ni.