Aizawl: Mizoram Pradesh Congress Committee (MPCC) chuan nimin khan Congress Bhavan-ah Monday Devotion leh Political Session an hmang a. Inkhawma thusawitu Aizawl District Congress Committee (ADCC) President Lalhmingthanga Pachuau chuan, Mizoramin sorkar a hrawn mek hian sorkar kal tawhte tih sa sawihnawm hi a tihtheih tawk tih a sawi.
ADCC president chuan “Kan hotuten kan ram hi tih takzetin an lo kaihruai tawh thin a, chuvangin kan ram hian tun dinhmun hi a thleng thei a ni. Kan ram tun dinhmun a lo thlen theih nana pawimawh em em chu Pu Lal Thanhawla’n lalthutthleng a kian kha a ni. Kha vang khan kan ramin leirem a rah theih phah a ni,” a ti.
Lalhmingthanga Pachuau chuan NLUP vangin mi tam takin eizawnna bul tanna tur an dawng a, bul an tan theih phah a, mi tam takin an hlawhtlinpui tih a sawi a. Tuna MPCC president hian minister a nih laiin medical college, MIMER an tih mai kha an din chu a hnuah tuten emaw a hming an thlak a. Lengpui Airport pawh Congress hotute din ni mah se, mi thenkhatin lan mawi te, chak ni a lan duh ten hralh te an tum lehte hi thil zahthlak tak a nih thu a sawi.
Ramin hma a sawi lo tih chu thu belhchian dawl lo tak a ni tih sawiin ADCC president chuan, “Hun kal tawhah khan kan hotute khan thil tam tak an lo ti tawh a, tun dinhmun hi kan thleng thei a ni. Kan sorkar hrawn mek hian sorkar kal tawhte tihsa sawi hnawm hi a tih theih tawk a ni a, enkawl pawh enkawl zui hleithei lo a ni. Heng hi mipui hian an hrethiam tawh,” a ti bawk.