Aizawl: BJP MLA K Hrahmo chuan Mizorama sorkar mek, ZPM party-in issue base-a central sorkar an thlawp tur thu an sawi angin central pawhin issue base bawka a support avangin state sorkar hi a rethei phah tih sawiin, pawi a tih thu a sawi.
Thawhtanni khan BJP Mizoram chuan an party pisa-ah chawlhkar thar inhlanna leh political session hun an hmang a. Palak bialtu MLA chuan BJP leh a thawhpuiten sorkarna an siam dawnin Mizoram pawh sorkara tel ve tura sawm ni mah se ZPM sorkar chuan chu sawmna chu issue base-a an thlawp tur thu an puang a. Khang hunlai khan ZPM hian issue base ni lovin zawm se chuan Mizoramin tun huna suma harsatna a tawh a pumpelh tur thu a sawi.
K Hrahmo chuan Mizoramin union minister neih theihna hun tha tak leh Kristiante tan mai bakah state pawn missionary-te tan pawha rawngbawlna atana puitu tur anih a beiseiawm vei nen a pawi takzet tih sawiin, “Kan state-a sorkar mekten issue base-in central sorkar kan support ang an lo ti si a, central pawhin issue base tho bawkin min lo support nge ni? Kan state sorkar hi a rethei ta hle mai hi a pawi hle a ni,” a ti.
MLA fund-ah sawiselna a hluar tih sawiin K Hrahmo chuan, “MLA-te hamthatna chu za zel ah 420 an ti a. Mahse, MLA-te hian sorkar hmasa ang lo takin lirthei lei nana MLA pakhat zela Rs nuai 10 an pek tawp kha tibo vin, tunah chuan MLA ten Rs nuai 15 a thlawn ni lovin, lirthei atan loan-in kan la thung a, tuna MLA-te lirthei loan ang hi chu mi mal pawhina kan lak theih ang tho a ni,” tiin, MLA tan chuan hamthatna a awmlo tihna a nih thu a sawi bawk.