Aizawl: MNF President Zoramthanga chuan MNF party chu harsatna tam tak karah pawh ‘Pathian leh kan ram tan’ tia Pathian hming an lam tlatna chu Pathianin mal a sawm tih a sawi.
Thawhtannia Mizo Hnam Runa chhung inkhawmah MNF president chuan, “MNF dam khaw chhuahna hi lalpa rawngbawl tur leh, ram leh hnam Pathian tana vawnghim a, tihhmasawn a ni, tih hi MNF zawng zawngin vawng reng turin ka duh a ni,” a ti.
Chief minister hlui, Zoramthanga chuan “MNF kan sorkar a, kan tla leh thin a, kan sorkar leh thin a. Hengte hi kan tan a tha a ni. Kan insiam that nan leh kan inzir fin nan kan tla thinte hi a tha a ni,” a ti a. “Mizoramah Political Party 30 chuang a lo ding tawh thin a. Tun thlenga hnam party la ding awm chhun hi MNF chiah kan ni. Mizo Union leh PC te kha ral thei lo tura mawi an ni, an chak em em a. Mahse, an awm ta lo. MNF erawh kum 64 Pathianin min hruai ta a, kan chak zual zel a ni,” a ti.
MNF president chuan, “MNF party hian harsatna a tawk lo bik a ni lo a, harsatna tam tak karah pawh ‘Pathian leh kan ram tan’ tia Pathian hming kan lam tlatna chu Pathianin mal a sawm a ni,” a ti a. “Isua vana a lawn dawna thu min pek ‘thil siam zawng zawng hnena chamchintha hrilh’ hi MNF innghahna leh thil tum bulpui ber a ni,” tiin hei hi MNF mi leh sa zawng zawng chuan vawng tlat turin a chah.
Zoramthanga chuan a chanchin ziahna lehkhabu, ‘From Rebel To Leader’ tih chu khawvela publishing company lian ber pawl, Penguin-in an chhuahsak dawn tih a sawi a, inremna pawh an ziah tawh thu a sawi a. A lehkhabu a chhuah hunah zalenna sual laia thil thlen dan dik tak a hriat theih dawn tih a sawi a. “Mizo nationalism hi Pathianin a tawp mai a phal lo. A sang tel nunna hlanna leh a sing tel tawrhna avanga lo piang hi a vul zual zel dawn a ni,” a ti.