Aizawl: Home Minister K Sapdanga chuan sorkar kum khatnaa mahni flagship programme bawhzui awmchhun chu ZPM sorkar chauh hi a la ni tih a sawiin, “Flagship programme tihhlawhtlin vat hi âtna a nih ngai chuan, kan hotupa ho hian kuthnathawktute tan kan lo â zel phawt ang,” a ti.
Thawhtannia ZPM-in an party pisa-a chhung inkhawm an neihah K Sapdanga chuan, “Sorkar hrang hrangin flagship programme kan nei thin a, keini chuan kum khat lek chhungin kan flagship programme kan tihlawhtling nghal a. Mahni flagship programme, sorkar kum khatnaa bawhzui awm chhun chu ZPM sorkar chauh hi a la ni,” a ti.
Aizawl North III bialtu MLA ni bawk, K Sapdanga chuan mipui sorkar lak luh an nih chiah khan Chief Minister Lalduhoma’n a minister-ten ni 100 chhunga thawh zawh tur home work a siam a, Pathian zarah ni 100 chhungin an zo thei tih sawiin, “CM home work min pek kha a huphurhawm khawp mai a, sorkar thar lawmna inchibaina hun pawh awm miah lovin kan phe nghal sung sung a, kalphung thar kan hmu nghal a ni,” a ti.
K Sapdanga chuan thlai thar leina tur sum budget-ah dah anih thu leh sawisel ngar ngatute sawhthing nen lam an lei tih a sawi a. A kum khatnaah hmun 672 atangin sawhthing quintal nuai 3 vel lei a ni a, Rs vbc 120 velin thingtlanga sawhthing chingtu kuthnathawktute chhungkaw sing hnih vel choka a thleng tih a sawiin, “Technical problem avangin sawhthing hralhtute hnenah sum tlema zawng kan la thun thei lo,” tiin, rei lo teah an thawh hah man an hmu dawn tih a sawi.
Thalaiten an thiam zawng leh tui zawnga eizawn bul tanna an neihna turin Hand Holding Scheme hmangin hma an la mek tih sawiin K Sapdanga chuan, “He policy hi mi taima leh mi dikte tan chuan hahdam taka eizawn bul tanna a ni a, dinchhuahpui awlsam tak a ni. Sum puk rul tha duh lo leh hmang dik lote tan erawh chhiatpui hlen theih, tu leh fate thlenga leiba rulhsen loh neih theihna, policy tihbaiawm tak a ni. Taima leh dikte pual project a ni. Flagship programme tihhlawhtlin vat hi âtna a nih ngai chuan kan hotupa ho hian, kuthnathawktute tan kan lo â zel phawt ang,” a ti bawk.