India mipa football team dinhmun a hniam zel a, FIFA ranking chhuak thar berah 133-na niin, hei hi kum kua chhunga a hniam ber tum a la ni.
June thla khan India chu a zawnin an chak lo a, hei vang hian ranking tharah pawh a hma aia hmun ruk ngawtin an hniam phah a. June 4-ah Thailand nen friendly an khel a, India hi 0-2 in an chak lo a. He mi hnu lawkah Asian Cup qualifying an khel a, anmahni aia ranking hniam, Hong Kong chu 0-1-in an hneh lo leh bawk.
Result an neih that loh avangin head coach Manolo Marquez chu All India Football Federation (AIFF)-in an bân phah a. India dinhmun hniam lai ber chu December, 2016 khan niin 135-na an ni a, an thlen san ber thung chu February, 1996 khan niin 94-na an ni.
India hian rating point 1,113.22 an hmu a, a hma khan 1,132.03 an hmu a. Tun dinhmunah Asia khawmualpuia ram 46 zingah 24-na an ni a, Japan chu Asia bika sang ber an ni a, FIFA ranking-ah 17-na an ni bawk.
Marquez-a enkawlna hnuaiah India chu vawi riat an feh chhuah hnuhnungah vawi khat chiah an chak thei a, March thla khan Maldives an hneh a. Kum 2025 chhungin vawi li an khel tawh a, vawi khat an chak a, vawi khat an inhnehtawk a, vawi hnih an tlawm.
Result an neih chhiat avangin India striker chhuanvawr Sunil Chhetri chu an koh let leh phah a, chuti chung chuan eng vak an ang thei ta chuang lo.
October thlaah hian India chuan Singapore an tlawh ang a, Asian Cup qualifying third round an khel ang.
World champion ni mek, Argentina chu FIFA ranking tharah hian ram 210 zingah an chungnung ber a, Top 10 huangah hian Spain, France, England, Brazil, Portugal, Netherlands, Belgium, Germany leh Croatia te an awm a ni.
Costa Rica chu kaisang nasa ber niin, a hmaa an awmna aia hmun 14 ngawta sangah an chho a, Honduras chu point hmuh belh hnem ber an ni bawk.