Chawlhkar ruk liam taa Asia-a end-of-season tour nei tura an chhuah hma lawkin Manchester United head coach Ruben Amorim-a chuan season thar atan duh bik a nei tih a sawi a. A duh loh player pangate dinhmun sawi ve thung ang.
Pre-season atan United squad hi an training leh tan tawh a, Inrinniah Leeds United nen Stockholm-ah an inkhel dawn.
Player duh loh panga – Marcus Rashford, Antony, Jadon Sancho, Alejandro Garnacho leh Tyrrell Malacia te chu a hranga training club-in sum tuak nan a hmang dawn.
Tunah hian langsar taka lak luh chu Matheus Cunha chiah an la nei a, £ maktaduai 62.5-in Wolverhampton Wanderers atangin an la lut a. Rashford-a No. 10 hak chu an pe nghal.
Amorim-a hian a squad a siksawi dan tur hriat vek theih a la ni lo va, player a hralh dan azirin thil la thleng thei a ni.
Tun dinhmunah chuan player panga, ‘bomb squad’an tih maite hi United-a Carrington training ground chu Amorim-a hova squad dang an chhuah hma chu damlo thila inenkawl nan bak an hmang thei lo.
Antony, Sancho leh Malacia te lei nan hian club-in £ maktaduai 167 chuang a seng a. Rashford leh Garnacho erawh ‘home grown’ an tih ang chi a ni a, £ maktaduai 82.34 man vel tur niin transfermarkt.co.uk website chuan a tar lang.
Amorim-a hian a hralh vek thei a nih chuan squad tihchakna tur mi dang, a duh ang lei nan tangkai takin a hmang thei dawn a; mahse, tun thlengin mumal taka dawrtu an la awm lo hlawm.
Old Trafford hian Bryan Mbeumo chu Brentford atangin £ maktaduai 60-a lei an tum a, Amorim-a pawhin pre-season tour-a hruai hman a duh a. Hemi bak hi chu a player hnawl tawhte a hralhna atangin a lei zui hmel hle.
Rashford chu Barcelona-in an duh tih sawi a awm a, a kal mai pawh a rinawm hle.
Sancho-a’n Juventus a pan rin a ni a; mahse, coach Igor Tudor-a duh ber erawh season liam taa FC Porto atanga an hawh, Portugal international Francisco Conceicao-a lak ngheh a ni.
Real Betis-in season chawhnu lam zawng hlawhtling taka an hawh, Antony chu a ngheta lak an duh viau bawk.
Garnacho hi Chelsea, Napoli leh a lo khelh tawhna, Atletico Madrid nen sawi zawm an ni a. Malacia hi Celtic-in an thlithlai mek.
Sawi zawmtu nei neuh neuh mah se tute mah hi mumal taka dawr an la awm lo thung.
Rashford leh Sancho te hi Premier League-a hlawh tam ber berah an tel a, hei hi mutan a ni a. An hlawh tihhniam an duh lo a niha chhuahtir an si chuan United hian an an hlawh thenkhat tumsak zui emaw, zangnadawmna pek emaw an la ngai thei.