Sorkar hmasain Aizawl Bazar Building sak zawh huna seat pek leh tura inremna a siampui mi 1,300 chuangte dinhmun ennawn a ni dawn.
Thawhlehni khan Commerce & Industries Minister F Rodingliana hovin a pisa-ah Aizawl Bazarpui tia hriat, Aizawl City Centre leh Aizawl City Centre Annexe Building sak mek dinhmun ennawnin an thukhawm.
Thutkhawmah hian bazar building thiah hmaa seat lo nei, sorkar hmasain bazar building sak zawh a nih huna seat pek leh tura inremna a siampui mi 1,300 chuangte chungchang hi endik leh vek tura tih a ni.
Sorkar dan ding lai angin heng bazar seat-te hi mi dang kuta hlanchhawn emaw, hralhchhawn emaw, khap tlat a ni a, a tira seat pekte ngeiin bazar seat hi an la luah em tih uluk taka endik tura tih a ni a. He endikna hi voter’s ID leh original document hrang hrangte hmanga endik tur niin allotment neitute pawh koha interview neihpui an ni dawn.
Bazar building pahnih – Aizawl City Centre leh Aizawl City Centre Annexe Building sak mekah hian tuna ruahman dan chuan dawr 1,415 awm thei tura duan a ni a, sorkar hmasain bazar building sak zawh a nih huna seat pek leh tura inremna a lo siampui mi 1,300 chuang an awm mek.
Bazar seat-te hi hralh chhawn emaw, inhlanchhawn emaw phal a nih loh avangin hetianga lo ti man chhuahte chu an allotment cancel tura tih a ni a. Dawr luahman ennawn bakah dawr luahtuten security deposit dahtir tawh turin thutkhawmah hian rel a ni bawk.
Hei bakah ei tur zawrhna sira hriselna atana tha lo heng vaihlo, tuibur leh a dangte seat allotment hi a tul dan azira ennawn leh ni se tih a ni bawk.
Thutkhawmah hian Dr Lalzirmawia Chhangte, Commissioner/Secretary leh Maria CT Zuali, Director bakah Commerce & Industries Department a officer-te an tel.