Kremlin chuan US President Donald Trump-a’n Russia-in a sumdawnpui ramte laka tariff sang zawk laka a vau chu a ngai serious hle a, ngun takin a zir chiang dawn tih a sawi.
Russian President Vladimir Putin-a laka a lawm loh hle laiin Trump-a hian Thawhtanni khan Nato kaltlangin Ukraine hnenah Patriot missile system telin ralthuam tam zawk a pe dawn tih a sawi a, Moscow-in ni 50 chhunga Kyiv nen inremna an nei lo a nih chuan Russian bungrua leitu ramte lakah sang takin tariff a la dawn tih a sawi a. Hei hi Washington-in Ukraine indonaa thu a neih thar ber a ni.
“US president thu sawi hi a serious hle a. Thenkhat phei chu a mi mal taka President Putin-a chungchang thil a ni,” tiin Kremlin thupuangtu, Dmitry Peskov-a chuan Moscow-ah thuthar lakhawmtute a hrilh.
“Washington-a thil sawi hi ngun taka zir chian hun a ni a. A tul a nih chuan President Putin-a hian a la sawi ve dawn a ni,” a ti.
Russian president hlui, Dmitry Medvedev-a chuan Trump-a thu puan hi demin ‘lemchanna’ tia sawiin ‘Russia-in a ngai pawimawh lo’ a ti a. Russia-a Security Council deputy chairman ni mek hian indona kal mekah hian thuchah hrawl tak tak a lo tichhuak tawh thin.
Russian Senator Konstantin Kosachev-a pawhin American hruaitu thu sawi hi engah mah a ngai lo tih a sawi a. Trump-a thupuan chuan Russia-a mipui thinlungah engmah a thawh loh thu leh United States hian Europe tan thang a kam a, Nato ramte chu ralthuam a leitir ang a, US arms industry-in a hlawkpui dawn tih a sawi a ni.
“Heng thil hi American military-industrial complex chauh hlawkpuitu tur an awm,” tiin Kosachev-a hian Telegram-ah a tar lang a ni.
Ukrainian Security & Cooperation Center dintu zinga mi, Olesia Horiainova-i chuan US hian Ukraine hnenah ralthuam a hralh zel a beisei thu leh Russia hrekna ‘na zawk’ a awm a beisei tih a sawi ve thung.
Al Jazeera hnenah US-in Russian tuialhthei leitu ramte laka chhiah sang zawk a la tur chuan Russia eibar a nghawng ngei dawn tih a sawi bawk.
“Russia sumdawnnaa pawsa lut apiang hi tunah hian indonaah hman vek a ni a, ni 50 emaw, a aia hma emawa hrekna hi hman a nih chuan a nghawng a na hle dawn a ni,” a ti.