Aizawl: MZP President H Lalthianghlima chuan Mizo hming hawha Mizoram chhunga hnam dang sumdawnna kalpui an tam thu leh an huangtau ta lutuk chu MZP-in a vei tih a sawi.
Nilaini khan MZP rorelna sang ber dawttu, Federal Council vawi 59-na chu MZP Conference Hall-ah neih a ni. Rorel tan hmaa thusawitu MZP President chuan, MZP-in Mizo hming hawha Mizoram chhunga hnamdang sumdawnna kalpui an tam ta lutuk leh an huangtau lutuk a vei thu sawiin, tlang hrang hranga MZP-te chu a theih ang anga hnam dang hming hawha sumdawngte dap chhuak a, hma turin a sawm.
MZP President chuan hnamdang zingah Mizorama lirthei khalh an tam thu sawiin, “Mistiri ten an duh duh dana rate an inchhiar leh, contractor ang maia contract system a thil an kalpui hi kan ngaimawh hle a ni. Sorkar hnathawk leh department zingah, an hamthatnain a ken tel entitlement aia tam lirthei kawl an awm tih MZP-in a hria a. A tul angin kan bawhzui ang,” a ti bawk.
MZP Federal Council chuan, sorkar hnathawk pension tawh rawih nawn chungchanga MZP ngaihdan a la ngai reng tih nemnghetin, sorkar hnathawk pension tawhte rawih nawn an nih loh nan hmalak zel nise a ti.
MZP Federal Council-ah hian, MZP Headquarters, Sub Headquarters, Branch, Hnampual leh College SU atangin rorel palai an tel a ni.
MZP Federal Council Sitting vawi 59-na chuan MZP rorelna sang ber Assembly 2025 Agenda atan Sairang thleng a rel a lo luh dawn avangin, Mizoram chhunga rel tlanna kawng/ chawlhhmun (station)-ah ILP checkpoint siam a nih theih nan MZP-in hma la rawh se; NHIDCL hnathawh hi a that tawk loh thin avangin, MZP-in a that zawk theih nan hma la rawh se leh Zofa hnam inkhawmpui lian ‘ZOFEST’ hi 2026-ah neih leh ni rawh se.