Aizawl: Nikum leh kumina Mizoram Journalist Association (MJA) member thi pali chhungte hnenah sorkar atanga ralna (ex-gratia) nimin khan hlan a ni.
MJA member thite chhungte hnena ex-gratia hlanna hi nimin chhun dar 12 khan Treasury Square-a I&PR Conferece Hall, Lianchhiari Run-ah neih niin, sorkar aiawhin Information & Public Relation, Printing and Stationary Department changtu Minister Dr. Vanlalthlana’n ralna a hlan.
Sorkar chuan accredited Journalist boralte chu Rs. 1,50,000 leh non-accredited Journalist boralte chu Rs. 1,00,000-in a ral a ni.
Ralna inkhawm hi IPR&PS department Secretary Betsy Zothanpari Sailo-in a kaihruai a. IPR&PS Minister Dr. Vanlalthlana’n thu a sawi a, MJA President C. Lalrambuatsaiha’n MJA member thite chanchin tawi a sawi bakah, lusun chhungte pawhin thu an sawi a. MJA member thite sunna pualin minute khat chhung ngawi renga dinga hun hman a ni a. Inkhawm hi I&PR Director C. Lalnunkima’n lawmthu sawiin a khar a ni.
MJA member ralna hlan te hi Lalhmingmawia Pachuau, Editor, Pasaltha Daily Chanchinbu, Champhai; Johan Lalhmunmawia, News Stringer, DDK, Lunglei; H. Lalngaihawma, Hnehtu Daily Newspaper Editor, Aizawl leh T.C. Lalmuankima, Correspondent, RNU, AIR, Aizawl te an ni.