- K. Hmingthankaia
Engmah thiamna leh hriatna thuk nei lo ni mah ila, awmhmun atanga ka phak tawka ka lo vei ve em avangin, tun ZPM Sawrkarah phei chuan kawng chunchangah hian rawtna leh fuihna ka sawi ve ta nual mai.
Kawng hi mipuiin sawrkar kan tehna lian ber a nih thute, thal lai a nih vanga mipui leh opposition an bengchheng loh vanga inthlahdah mai lova kumtluana kawng chauh atchilh bur mai turte leh, chumi tur chuan, kan tlangrampui thenkhatte anga kawng chauh enkawltu tur Minister neihte, NHIDCL na zawka nawr turte, NHIDCL leh an hnuaia contractor-te tlawn leh vau chung renga dawr pawha sawt si lote, kan vaia tanruala NHIDCL hnuaia Mizo contractor awm ve theih dan zawng turte, Mizoram kawng zawng zawng cement hmanga siam vek nise tihte chu ka lo sawi ve tawh a. Mahse, ZPM kum hnih chhung hi chuan, ‘ Aw Lalpa a ngai bawk’ kan la ti hrih chu a la ni a. NH bik hi chu cement, rigid pavement an ti emawni tur khan CM- in Central lam a nawr niin kan lo hriaa, beisei takin kawng tha chu lo thlir zel phawt mai ang.
State highway leh khaw kar kawngte leh tualchhung kawngte hi chu, kawng chauha insawrbing tur Minister kan neih hunah emaw, a enkawltu department leh a thawktu mihringte an pianthar hunah emaw chuan a la tha chho ve mai turah ngai phawt mai ila.
National highway bik ho, Vairengte – Sairang leh Tlabung kawngte leh a dangte pawh, a thu neitu leh thawktu vai company leh vai contractor an nih chhung chuan, tuna kan awmdan ang hi chuan engtikah mah lungawi ni leh kawng that ni kan nei dawn lo niin a lang. Kan hriat theuh angin NH- te chu a nih dan tur ang taka siam tur leh enkawl tur chuan state tan a hautak lutuk bakah, NH chu central Ministry of Road Transport & Highway ( MORTH) ta leh an enkawl tur a ni. Tunhnaiah pawh Vairengte- Sairang kawng thenkhatah enkawltu zawkah an inpuh tawn sek kha.
Kan ramah tu ministry mahin NHIDCL-te hi an ngam tak tak ngai lo. Kan ram kawng bikah hian vaiho hian hna an thawk tha duh lovin, thahnemngaihna leh tih tak takna an nei ngai lo nia ka hriat thin avanga ka beidawng mangang thinur bawk siin, a tihdan tur ka lo ngaihtuah ruk ve thin, sawichhuah awm nia ka hriatte ka’n sawi ange. Heta sawi lan chi loh tih dan tur pawh a la awm thei ang.
- A hmasa berin, tuna kan ram awmdan thlirin, kawng chungchangah chauh pawh nilo, thil hrang hranga hma latu tur pawl thar, mahni intihlar nan leh mahni hlawkna tur ngawt ngaihtuah tur nilo, pawl chak tak ni satliah lo, pawl huaisen leh pawl hlauhawm tak kan din a tul ta niin a lang.
- Eng kawng pawh siam ila, tuihawk leh ruahtui tha taka inpaihna tur siam hi ngaihpawimawh hmasak ber, no.One te no.One ni zel rawh se. Hei hi mithiamte ngaihdan mai ni lovin, an chhutchhuah, kan ram atana min rawn a ni a, engatinge hman atang khan kan ngaihpawimawh duh miah loh. Kawng kan siama ngaihpawimawh ber tur chu a thenah kan siam lova, kan siam pawhin, tuihawk luanna tur leh culvert-te chu a hming mai mai, hmantlak tak tak loh a ni zel.
Chutiang chu kan nih avangin vaiho pawhin kan ngaipawimawh lo tih an hriaa, hna zawh thuai thuai, inthiarfihlim thuai thuai an duh avangin, kan lawm zawng, a langsar lai kawng pawnlang chu alkatara an zut mam dum pura, a pawimawh lai, chhunglam leh tui inpaihna lam ngaihtuah pha lovin kan lawm ve em ema, fur khat pawh kan kawngin a daih leh ngai thin lo a nih hi.
- NH bikah chuan, sawrkar kalphung pangngaia file leh lehkha hmang emaw, nem deuh leh zawiawi taka central lama thu thlen mai mai tawh lovin, NHIDCL leh an hnuaia contractor-ten neitu rilru pu vea, tun aia thahnem ngai zawk leh tih tak takna nen kan rama hna an thawh theih nan, Mizo mipui zawng zawng mangang aw leh thinur aw hi centrala kalchilhin, sawrkar laipui leh MORTH-a na taka thlen nise. A tul chuan kan lungawilohna pawh central lamah a takin, physically-a lantir mai nise.
- Central lama kan lungawilohna kan lantir mai bakah, kan ram lamah pawh a theih dan danin, central lam leh India ram pum hriat laih khawpin kawng chungchanga kan rama vaiho hna thawh dana kan lungawilohna lantir nise.
- Kan pawl huaisen leh hlauhawm takte chuan hma an la reng anga, kan kawng siamtu vaiho chu an dawrin an thlithlai reng ang. Chu pawl chu kan vaiin kan thlawp anga, kan tangrual hle tur a ni.
- NHIDCL leh vai contractor te hi office-a kohkhawma sawiho mai mai hi a zing tawh lutuk. Sawi laiin tha deuhin an tawnga, engmah a ni leh ngai lo tih kan hriat vek hi. Tuna kan awmdan ang hi chuan min hlau miah lo a ni. Kan tihthinrim chuan kawng min siamsak lo thei tih kha kan hria tih an hre tlat. Chuvangin, tihdan dang kan zawn a ngai tawh a nih hi. Dan bawhchhe chiah si lova na tak leh hlauhawm taka chet a ngai tawh a nih hi. Chutia kan tih avanga central sawrkar emaw, NHIDCL leh an hnuaia vai contractor-ten min tihtauhsan kan hlauh leh si chuan, engmah kan ang chuang lovang.
Hetia kumtin kumtluana kawng chhia avanga buai luih luih reng ai chuan, thil tha zawk thlen nan chuan eng pawh kan huamin kan tuar hmasa ngam tur a ni dawn lawm ni?