Pakistan-a Punjab province-a ruahpui vanawn sur avanga chhiatna hrang hrang thlengah darkar 24 lek chhungin mi 63 an thi hman a, mi 290 chuangin hliam an tuar a. Ruah hi Nilaini tuk atanga sur tan kha a ni.
Thi zinga a tam zawk hi in chim vanga thi niin tui lianin a lak leh electric-in a man an awm nual bawk tih National Disaster Management Authority chuan a sawi.
Islamabad dawta an khawpui ber, Rawalpindi-a thuneitute chuan Ningani kha ina mi an awm theih nan chawlhah an puang a, lui hnaih deuhva awmte chu insaseng turin an ti bawk.
June atanga fur an tawrh mekah thi hi mi 180 dawn an tling ta a, an zinga a zahve aia tam hi naupang an ni nghe nghe.
Punjab-ah hian tui lianin a chim avangin kawngpui tam tak khar a ni a, thlawhna lut leh chhuak tur pawh thulhtir leh tihkhawtlai a tam hle bawk.
Ningani khan province Chief Minister Maryam Nawaz-a chuan hmun tam takah emergency a puang a. “Sorkar hnuaia mite erawh a tul ang apiang thawk char char turin tih an ni,” tiin X-ah a tar lang a, mi chengte chu himna atana kaihhruaina siamte zawm tha turin a ngen bawk.
A hma nia ruah mm 400 zset surna, Chakwal khawpui thlalak leh video thehdarhah chuan rescue boat hmanga tui lian avanga tangkhangte awmna dapa an che chhuak lai a lang.
Sipai helicopter-ten tui a len nasat zualna hmunte chu van atangin an thlithlai bawk.
Punjab thuneitute hian tun kar tawpah hian ruah leh tui lian nasa zawk pawh a la awm thei tih an sawi lawk a. Province chhunga chhanchhuah hna thawktu sang chuangte chu inring renga awm turin an ti.
Mihring maktaduai 250 dawn chenna, Pakistan hi sik leh sa inthlakin chhiatna a thlen theih tuar na thei ber tur ram zingah a tel.
An tawrh theih zinga khaw lum lutuk leh khawkheng a langsar a, fur ruahtui tam lutuk a tel bawk.
Pakistan-ah hian vur khawn hmun 13,000 chuangah a awm a, hengte hi a tui ral chak hlawm hle.
Kum 2022 fur laia tui lian khan an ram hmun thuma thena hmun khat chimin mi 1,700 chuang an thi a. Eibarah nasa taka tuar bawkin an thil chhe hlut zawng chu $ tluklehdingawn 30 a tling.
Kum 2023 khan United Nations Secretary-General chuan ram dangte chu tui lian an tawrh atanga an thawh chhuah leh theih nana pui turin a sawm hial a ni.