Aizawl: School Education department minister Dr Vanlalthlana’n nimin khan Mizoram Board of School Education (MBSE)-in Pawl 12 zirlaibu Physics, Chemistry, Biology leh Mathematics, Mizo tawnga buatsaih chu a tlangzarh.
MBSE Conference Hall-a tlangzarh inkhawmah Minister Dr Vanlalthlana chuan sap tawng leh tawng dang hrang hrang thiam a pawimawh rualin, mahni pianpui tawng hlamchhiah phah nana hman erawh chu hnam anga boralna thlentu a nih theih thu a sawi a. Mizo tawng ngeia zirlai lehkhabu buatsaihna chuan zirna kawnga hmasawnna thlentu a nih a beisei bakah, hnam humhalhna kawnga hmanraw pawimawh tak a nih a beisei thu a sawi.
Dr Vanlalthlana chuan New Education Policy 2020-in a beisei anga zirlaibu eng emaw zah Mizo tawng a buatsaih a nih tawh bakah, tuna Pawl 12 Science leh Mathematics zirlaibu hman tur, Mizo tawnga buatsaih, tlangzarh lehna chuan Mizoram chhunga zirnain hmasawnna a hmuh phah ngei a beisei thu a sawi bawk.
Inkhawma tar lan a nih danin, MBSE hmalaknain Pawl 10 Maths leh Science subject lehkhabute kha tihchhuah hmasak ber an ni a, kum 2022 tawp lamah chhuah a lo ni tawh a. Pawl 9 Maths & Science lehkhabu kha 2023 kumtir khan tihchhuah a ni a. Pawl 9 leh 10 lehkhabute hi MBSE-in copyright a neih textbook an nih avangin translation type-a buatsaih a ni.
Pawl 11 leh 12 erawh chu copyright te a awm theih avangin translation ni tawh lo vin, textbook writers-ten reference material eng emaw zat nen tangkawpa anmahni irawma an buatsaih a ni thung.
Pawl 11 Physics, Chemistry, Biology leh Mathematics textbook-te chu June 28, 2024 khan tlangzarh an lo ni tawh bawk.
Pawl 12 lehkhabute hi vaiin copy 700 theuh chhuttir a ni a. Physics lehkhabu hi phek 493 niin Rs. 300 man a ni a, Chemistry hi phek 550 niin Rs. 350 man a ni a. Biology hi phek 331 a chhah niin Rs. 250 man a ni a, Mathematics hi phek 329 niin Rs. 250 man a ni.