Mizoram Pradesh Congress Committee (MPCC) thupuangtu, Dr Lallianchhunga chuan ZPM party hotuten eptu party an nih laia restricted tender pek dan an sawisel nasat em em chu an sorkar hnuah sorkar kal tawhte aia uar leh nasa zawka kalpuiah puh.
Nimin khan MPCC Media Department chuan Aizawl Press Club-ah thu thar thehdarhtute kawmin, an spokesperson Dr Lallianchhunga chuan eptu party an nih laia ZPM party hotuten an sawisel nasat em em chu MNF hnuaia restricted tender an pek dan a nih thu a sawi a. ZPM Leader Lalduhoma pawhin nasa taka sawiselin, MNF sorkar hnuaia sum leh pai harsatna nen a sawi zawm tih sawiin, ‘Restricted tender ringawt pawh an tih ve loh hian kan sum dinhmun chu, chu chuan nasa takin a siam tha nghal ringawt a ni,’ tiin ZPM-in Vana pa Hall-ah campaign kick off an neih tuma a sawi thu a sawi.
Dr Lallianchhunga chuan sorkar document an hmuh theih atanga a lan danin April 17, 2025 khan SASCI 2024-25 hnuaia hna Rs vbch 629.17 man chu restricted tender hmanga an duhsak zawngte an thawhtir theihna turin department-te chu blanket approval a pe tih a sawiin, “Hei hi eptu party an nih laia an thusawi nen a inkalh chiang hle,” a ti.
RTI chhanna atanga a lan danin ZPM sorkar pian atanga April 29, 2025 thleng khan restricted tender hmangin hna lian tak tak 47, Rs vbch 316.38 (Rs.3,16,38,35,821) chuang man a pe chhuak tawh tih sawiin, “Hetiang khawpa an sawisel hi ZPM enchhin sorkar chuan sorkar kal tawhte aia uar leh nasa zawkin a kalpui ta hmiah hmiah mai a ni,” a ti.
MPCC thupuangtu chuan kum 2023 MLA inthlanpuia ZPM Manifesto-ah ‘contract hnate a tam thei ang ber open tender-a koh thin a ni ang’ tih leh ‘loh theih loha restricted tender-a thawh ngai a awm a nih pawhin, dik taka dan zawm thlapa tih a ni ang’ a awm tih sawiin, “An party manifesto ngei pawh palzuta ZPM enchhin sorkarin restricted tender a kalpui dan hian sorkar belhchiandawl leh rintlak tak a nih loh zia a tilang chiang hle a ni,” tiin, mahni thusawi leh intiamna manifesto phatsana thil tih hi kalphung thar an tih chu em ni, tih chu an zawhna a nih thu a sawi bawk.