Chelsea chu kum 1992 atang khan Premier League club zinga player leina atana sum hmang hnem tawh ber an ni a, tun thlenga player leina atana an sum hman tawh zawng zawng chu £ tluklehdingawn 4.1 a ni.
Todd Boehly hnuaiah kum thum chhungin Chelsea hian £ tluklehdingawn 1.3 an hmang tling tawh a, heti hian Premier League huangah chuan player leina atan sum hmang hnem ber an nih theih phah.
Club World Cup champion hian heti zat sum an hman hian Premier League nomawi vawi nga an la tawh a ni.
Kumin nipui laiin Joao Pedro, Liam Delap leh Jamie Gittens te an lei tawh a, heti hian £ tluklehdingawn 4.1 an hmang tling ta niin Transfermarkt chuan an tar lang.
Sum hman hnem lama anmahni hnaih bertu, Manchester City aiin Chelsea hian £ tluklehdingawn 1 zetin an hmang hnem zawk a. Cityzens hian player leina atan £ tluklehdingawn 3.1 an hmang ve tawh bawk a ni.
Manchester City hnuai chiahah hian an thenawm club, Manchester United an awm a, anni hian £ tluklehdingawn 2.8 an hmang tawh a. Manchester khawpui club pawisa hman inthlauhna hi £ maktaduai 300 vel niin Manchester City hian kum 2008-a Sheikh Mansour-a hun a intan atang khan pawisa hi an hmang nasa hle.
Liverpool chu pawisa hman hnem lamah hian palinaah an awm a, anni hian player lei nan hian £ tluklehdingawn 2.3 an hmang tawh a, Florian Wirtz, Jeremie Frimpong leh Milos Kerkez te an lak luh vangin an sum hman hi a tam phah a. An hnuai chiahah hian Arsenal awmin, anni hian £ tluklehdingawn 2.2 an hmang ve tawh bawk a ni.
Tottenham Hotspur chuan player lei nan hian £ tluklehdingawn 2 an hmang tawh a, parukna an ni mek a. Everton chu an hnuai chiahah hian an awm a, £ tluklehdingawn 1.3 an hmang tawh a, Newcastle United, West Ham United leh Aston Villa te nen an sum hman zat hi a inang a, anni hi Top 10 huangah an awm hlawm a ni.
Southampton chuan £ maktaduai 840 an hmang tawh a, 11-na an ni a. Wolverhampton Wanderers chu an hnuai chiahah hian an awm a, an sum hman tawh zawng zawng chu £ maktaduai 798 a ni a. Leicester City chu 13-na niin, £ maktaduai 784 an hmang tawh a, £ maktaduai 769 hmangtu Brighton & Hove Albion chu 14-naah an awm .
Bournemouth chu 15-na an ni a, an pawisa hman tawh zawng zawng chu £ maktaduai 637 a ni a. 16-naah £ maktaduai 614 hmang tawh, Fulham an awm a, an hnuaiah hian £ maktaduai 586 hmangtu Crystal Palace an awm bawk.
Leeds United chuan £ maktaduai 555 an hmang tawh a, 18-na an ni a, £ maktaduai 535 hmangtu, Sunderland leh £ maktaduai 428 hmangtu, Nottingham Forest te chu Top 20 huangah an tel pha bawk a ni.