AZL: Vawiin atanga tan tur, parliament Monsoon Session inbuatsaihna All Parliamentary Floor Leaders Meeting nimin chhun dar 11-a neihah, thusawi tura hun pek a nih angin Rajya Sabha MP K Vanlalvena’n Lengpui leh Delhi inkar thlawhna chuan man to lutuk chungchang a sawi chhuak.
Rajya Sabha MP K Vanlalvena hian July ni 8, 2025-a Aizawl atangin Delhi pana Indigo flight-ah chuangin, thlawhna ticket man hi Rs 25,951 a nih thu leh chu chu Delhi leh Indonesia khawpui Jakarta thlawhnaa kal man ai pawha to zawk a nih thu a sawi a. Hei bakah, kum tinin Krismas dawn, December thlaah thlawhna ticket man Delhi leh Aizawl inkar, Indigo Air service ten an tihsan bik ziah thu a sawi lang bawkin, sorkar laipui hnenah he harsatna hi sutkian sak turin a ngen a ni.
July ni 21 atanga tanin, August ni 21, 2025 thleng Monsoon session hi neih tura ruahman a ni.