Aizawl: Aizawl Mihlun Thlah pawl hruaitute chuan Zirtawpni khan Aizawl Traffic Senior SP Ruatsanga Ralte chu a pisa-ah kawmin, Aizawl traffic jam tihziaawm dan tur sawipuiin rawtna hrang hrang an thlen.
An thu thlen zingah Dawrpui Israel point-a Zarkawt lama lo kal leh Zion Street atanga lo chho intawkkhawm hi tuna thunun/control danah chuan a chhawka tihdin thin a ni a. Hei hi khawi lam mah mah tiding chuang lova pakhat zela intlanchhawk tir nise rei tak dinga innghak kher lovin muang tete-in an tawlh theiin an ring.
Bazar lam atanga lo kal, Zodin Square a kual tir thin hi traffic tibuaitu bul a ni fo tih an thlen a. Hetah hian kual lovin Governor Gate-ah chhuk thlain Tennis Court-ah kual tir a, Khatla lam atanga lo kal nen chauh an intawk/merge ang a, a ziaawm zawkin an ring.
Tuikual Kaisara road lam atanga lo chho hi lirthei a tam loh avangin ngaimawh thamah an ngai lo va. Aizawl chhim lam atanga lo kal, Dawrpui Presbyterian biak in bula kualtir thin hian Traffic a su buai fo bawk nia hriain, hei hi kual tir lovin Chanmari-ah kual tir vek ni se, Bara Bazar bawra traffic buai luai luai reng hi a ti ziaawm theiin an ring.
Traffic Senior S.P chuan Aizawl Mihlun Thlahten Aizawl an veizia an tilang chu lawmawm a tih thu thu sawiin, an lehkha theh luh chu ngun taka an lo zirchian tur thu a sawi.