ZPM Thalai General Headquarters President Jeje Lalpekhlua, MLA chuan eptu lamin minister-te an beihna hrang hrangah thil dik lo leh fuh tawk lo chhui chhuah an la neih loh thu a sawi.
Thawhtanni khan ZPM chuan an party pisa-ah chhung inkhawm an nei a. He huna thusawitu South Tuipui bialtu MLA ni bawk Jeje Lalpekhlua chuan, eptu lam atangin minister-te hmalakna hrang hrangah, mipui rilru hruai kawi thei tur zawnga beihna a awm fo va, he’ng beihna te hi ZPM Thalai chuan theihtawkin an chhui chiangin an venpui thin thu a sawi.
ZPM Thalai President chuan lehkha pawimawh awm thei hrang hrangte an la khawm a, tun thleng hian minister-te an beihna hrang hrangah thil dik lo leh fuh tawk lo chhui chhuah an la nei lo tih sawiin, “Hei hian kan Minister-te dikna leh thawh rimzia a tilang chiang hlein ka hria,” a ti.
Chief Minister Lalduhoma kaihhruai sorkarah hmasawnna tam tak hmuh tur a awm tawh tih sawiin Jeje Lalpekhlua chuan, “Kan hotuten an sawi fo thin, ‘kut hna thawktute hmangaihtu kan ni’ kan tih ang khan sorkar hmalaknaah hian kut hna thawktute tana hamthatna tur a tam,” tiin, an kal kualnaah kut hnathawktute’n rim taka an thawh hah man an hmuhpui chuan hnukte pawh a ulh hial thei tih a sawi a. Tunah hian sawhthing nei tute account-ah pawisa thun mek zel a ni a, account-a la lut fel chiah lo te pawh an awm bawk a, pawisa an khawl theih phah ve thung tih a sawi.