Joint Civil Society of Mizoram (JCM) chuan Kawnpui leh Sairang inkar kawng chhia laite a rang thei ang bera siam turin NHIDCL an phut a. Darkar 48 chhunga hmalakna duh ang an neih loh chuan hnatlangpui koh an tum tih an sawi.
Thawhtanni khan Aizawl Press Club-ah thu thar thehdarhtute kawmin JCM hruaitute chuan July 19, 2025 khan Kawnpui leh Sairang inkar kawng dinhmun an enfiah a, kawngpui chhiatzia a takin a hmunah an hmu tih an sawiin, “He kawngpui pawimawh km 40 vel, Mizoram lifeline hi lirthei tan kal rual loh a ni tih a lang,” an ti.
He kawngpui hi a chhe tak zet tih sawiin JCM hruaitute chuan, “Tanker-te leh motor dangte pawh an tlan duh lo/thei lo hi âwm tak a ni. Khuar thuk tak tak te, tui tling thuk tak te, chirhdiak leh kawng nal em em te a awm a, motor khalhtute tan anmahni nunna leh motor tan a hlauhawmin a manganthlak tak zet a, motor tlu a awm nual bawk,” tiin, mipui ni tin nunphung a tibuai tak meuh tih an sawi.
JCM hruaitute chuan kawng chhe siam tur hian excavator pathum leh JCB pakhat hnathawk an hmuh thu leh mihring hnathawktu phei chu mi panga vel chiah an hmu tih sawiin, “Excavator-te pawh hi a chhe lai siam tur vek ni lovin motor tang nawr chhuahna atantea dah an niin a lang,” an ti.
Truck ding ngir khupin kalkawng a tihpin vek avangin Khamrang leh a chhehvel khaw mipuiten harsatna tam tak an tawk a, châk lakna tur motor a kal thei lo va, damlo tan damdawi in pan a harsain office dawr turte pawhin kea kalte a ngai a, motor tang tlawmngaia buaipuiin an hah hle tih an sawi bawk.
JCM hruaitute chuan kawng chhia hi thui viau mah se, tlan theih loh tawpna, khuar thuk lutuk lai chu a sei berah km khat bak a ni lo va. Khuar thuk lutuk pawh hi hmun paruk vel bakah a awm lo nia a lan thu an sawi a. Kawng hi mam leh hnum turin tumahin an beisei lo va; mahse, kal theih a siam erawh mi zawng zawng beisei a nih thu sawiin, “Hetianga siam tur hian thil harsa lutuk niin a lang lo va, ni tam pawh a ngai lo niin a lang,” an ti.
JCM chuan central sorkar, a bik takin Ministry of Road Transport & Highways (MoRTH) leh NHIDCL te, Mizoram sorkar te rang taka hma la turin an ngen tih sawiin, kawng tha neih hi mipuite chanvo tura India danpui-in a tih a ni tih hriaa mipuite an chanvo pe turin an phut tih an sawi.
Nimin vek khan JCM hruaitute chuan NHIDCL Regional Office, Tuikhuahtlang, Aizawlah kalin Managing Director, NHIDCL, New Delhi hnenah emergency-in Sairang – Kawnpui kawngpui motor kal theih loh lai siam turin ngenna lehkha an pe a. Hna an thawh tanna atan hian darkar 48 chhung hun pein hemi hun chhung hian kawng siam that hna hi thawh a nih loh chuan July 26, 2025 (Inrinni) hian Zoram Hnatlang koh nise an ti a ni.
Kawng siam nan Rs. nuai 180 ruahman
Mizoram sorkarin Mamit leh Bairabi inkar kawng, Darlak leh Tuidam inkar kawng leh Kawnpui leh Sairang inkar kawngpui thawmthatna tur sum, Rs nuai 180 a ruahman.
Nimina Chief Minister Lalduhoma hova a pisa-ah PWD Minster Vanlalhlana, PWD leh Finance department hotute thukhawm chuan tun laia kawngpui chhe zual umzui dan tur an sawi ho.
Thutkhawmah hian Darlak leh Tuidam inkar kawng chungchangah, kawng thar zawk sialtu contractor te an tlakchhiat avangin an contract tihtawp loh theih lohvin an awm thu sawi a ni a. Tunah hian tender thar chhuah dilna central sorkarah a awm mek a, he dilna hi chak taka umzui mek a ni. A helna, kawng hlui, tuna hman mek hi PWD lamin a zualpui lo thawm tha tura tih niin, a thawhna tur pawisa pawh Rs. nuai 20 an ruahman.
Mamit leh Bairabi inkar kawngpui hi a grade a tha a, khuar a tam rih thung a. He kawngpui hi hman theiha a awm reng theih nan a tul lai apiang thawm tha tura tih a ni. He kawngpui hi eng emaw thulha Kolasib lam kawngpui a lo pin pawha hman theih a ni. A thawm that nan Rs. nuai 65 pek chhuah an rem ti.
Tuna bungraw phurtuten harsatna an tawhna lian ber Kawnpui – Buichali – Sairang kawngpui chungchang pawh an sawi a. NHIDCL te kuta awm, state sorkar mawhphurhna ni tawh lo mah se, ni tin châk lakna pui ber a nih avangin nikum lama sorkarin a lo hnawh tawh angin, kuminah pawh a zualpui hi hnawh leh mai ni se tih a ni a, hnathawh nan Rs. nuai 100 ruahman nghal a ni bawk.
Heng kawng chhia laite thawm that dan tur bawhzuitu tur Coordination Committee, Secretary PWD kaihhruaina hnuaiah din a ni a. Anni hian hmanraw mamawh te lakhawmin nizan atangin hna tan tura tih a ni. NHIDCL lam pawh na zawka nawr ni se, central sorkarah pawh a tul anga hriattir nise an ti bawk.