Kar liamta tawp mai kha a ni. Noah Cyrus chuan a album thar ‘I Want My Loved Ones to Go with Me’ tihchhuah lawmna concert neiin, London-a Islington Assembly Hall-ah show a nei a, a pa Billy Ray Cyrus pawh rawn dingchhuakin, hla pahnih an sa nghe nghe.
Show laihawl vel atangin kum 63 mi Billy hian a fanu hi a rawn zawm a, ‘Stand Still’ tih leh Billy Ray hla hmasa zinga mi ‘With You’ an sa dun a ni.
Billy hian a kawppui Elizabeth Hurley pawh rawn hruaiin, mipui mit an la in, lawmna authawm a ring hle.
Noah hian kartawpa a concert hlimthla hrang hrangte hi a instagram lamah dahchhuakin, a pa Billy nena hun an hman dun chungchangte pawh caption a siam tel a, a pa in a concert a zawm leh, a zaipui thei chu nuam a tih thu leh, a inchhuan thu sawiin, a hmangaih em em a pa hla an la sa dun thei hlei hleite chu a intihtheih thu a sawi nasa hle.
Noah chuan ‘With You’ tih hla phei chu a naupan laia a pain a sak sak thin thu leh, a lo sakpui ve thin thu a sawi a, min thlamuanna hla hi a ni bik hliah hliah, a ti bawk.
Noah Cyrus hian September thla hian album tih lar lehzual nan North American tour a nei dawn bawk a ni.