Kuminah Durand Cup lawmman an tipung nasa hle a, a hma aia let thum ngawtin an tisang dawn a, lawmman zawng zawng hi Rs. 3 crore a ni tawh dawn.
Indian Oil Durand Cup Organizing Committee chuan Zirtawpniah khan Asia khawmualpuia football hmanga inelna upa ber, Durand Cup vawi 134-na turah lawmman an tihpun thu hi an puang a. Champion team bakah pahnihna te, semi final lut leh quarter final lut te pawhin lawmman an dawng ang a, mi mal lawmman pathum a awm dawn bawk a ni.
Kolkata chuan group hnih an mikhual ang a, a vaiin match 15 an khel ang a, hetah hian quarter final, semi final leh final te a tel dawn a. Heng match hrang hrangte hi Vivekananda Yuba Bharati Krirangan stadium leh Kishore Bharati Krirangan stadium ah te an khel dawn a. Emami East Bengal FC, Indian Air Force FT leh a vawi khatna atana Durand Cup khel tur Namdhari FC bakah Bengaluru club South United FC te chu Group A ah an awm a, anni hi Kolkata a inkhel turte chu an ni a. East Bengal leh South United FC te chu July 23 a Durand Cup hawnnaah Vivekananda Yuba Bharati Krirangan stadium ah an inkhel ang.
Nikuma pahnihna Mohun Bagan Super Giant bakah Kolkata club lian tho Mohammedan SC, Border Security Force FT bakah Kolkata club tho Diamond Harbour FC te chu Group B ah an awm a. July 31 ah khian Kishore Bharati Krirangan stadium ah Mohun Bagan Super Giant leh Mohammedan SC te chuan Kolkata derby an khel dawn a ni.