Aizawl: Mizoram larsap Gen. Vijay Kumar Singh, chief minister Lalduhoma, Home Minister K Sapdanga leh Leader of Opposition Lalchhandama Ralte leh ram hruaitu hrang hrangin social media, Instagram kaltlangin Dampa bialtu MLA Lalrintluanga Sailo an ui thu an sawi.
Larsap Gen Vijay Kumar Singh chuan Lalrintluanga Sailo thi chu a ui tak zet thu leh a chhungte, a thiante leh a thawhpui a sunpui thu a sawi a. Ram tana a hna thawhte hriatreng a nih tawh tur thu a sawi.
Chief Minister Lalduhoma chuan ram tana an thawhpui, legislator tha leh taima, thusawi thiam leh debator ropui Lalrintluanga Sailo a ui thu sawiin, a thihna chungchangah sorkar pawhin tihtur apiang a ti zel dawn tih a sawi.
Home Minister K Sapdanga chuan, Dampa bialtu MLA chu Mizoram tana a theihna hlan thintu, ngaihtuahna mai bakah a taka thawk chhuak thin mi an chan chu pawi a tih thu leh a ui thu a sawi.
Leader of Opposition Lalchhandama Ralte pawhin, ram leh hnam tana a rawngbawlpui, hun lo taka Dampa bialtu MLA in a kalsan chu pawi a tih thu a sawi a. Zoram leh MNF tan channa nasa a nih thu a sawi.
MNF President Zoramthanga pawhin, Mizoram leh MNF tana Lalrintluanga Sailo inpekna leh a hnathawh zawng zawngte, a bial mipuite leh Dampa A/C hmasawnna tura a hnathawh zawng zawngte hriatreng a nih tawh tur thu a sawi bawk.