Mizoram chhunga inkalpawhna kawngpui hrang hrang chhia avangin rampum kan buai a, kan chak lakna kawng hrang hrang a chhiat leh pin miau avangin nitin mamawh a rawn lut tlem telh telh bawk.
Fur ruahtui tlak duh hun lai a ni a, ruahtui bawhawk a la awm reng bawk nen, vawiin thlengin kan ram kawngpui thenkhat chu lirthei tan mai ni lo, ke a kalte tan pawh zawh tlak loh a ni ta!
Kan nitin mamawh lakna kawngpui ber Kawnpui to Sairang kawng enkawltu NHIDCL te chuan nawrna a nat em avangin ni 10 chhunga a chhe zual lai siamthat an inbeisei thu an sawi a, sorkar atang pawhin nawrna a na tawh hlein a rinawm a, an insawi ang hian an awm em tih chu mipui thlir mek a ni.
MZP pawhin thawhlehni khan thuthar thehdarhtute hmaah July thla chhung ngeia siamthat an duh thu hi an sawi a, an siamtha lo a nih chuan NHIDCL office, Aizawl a mi chu kalhsak an tum thu an lo sawi tawh a, kawngpui kan neih that theihna tur a nih i beisei zel phawt teh ang.
Heti tak maia kumtin kan ram kawng a chhe zual ta zel mai hi vei a hun tawh a, kawngpui tha neih hi kan phu tawh a, eng sorkar leh eng company enkawl pawh nise, kawngpui tha kan neih theihna tur a nih chuan na zawka nawr leh vilzuipui hi mipui leh pawl hrang hrangte hian i ching thar zel ang u.