Aizawl: Sub Hqrs YMA Champhai chuan nimin khan raltlan inkaihhruaina dan tichhuak a, chibil pawl din an rem ti lo va, in hmun leh ram neih an remti lo bawk.
SYMA Champhai Co-ordination Committee (SCC) vawi- 22 na rorel inkhawmin ‘SYMA huam chhunga YMA Branch hrang hrang ten raltlan enkawlna leh kaihhruaina inangtlang kan neih theihna turin SYMA in kaihhruaina mumal tak siam rawh se’ tih an rel bawhzuiin, Branch hrang hrangte chuan SYMA Champhaiah rawt an thlen a, heng rawt luttute hi uluk taka an zichian hnuah raltlan inkaihhruaina hi nimin khan an tichhuak a, SYMA Champhai huamchhunga Branch hrang hrangte chu zawm nghal turin an hriattir bawk.
Raltlan inkaihhruaina dan thara tarlan a nih danin, raltlante chu an awmna Branch-ah an inziaklut vek tur a ni a. Hemi rual hian Myanmar raltlan te chu Myanmar ID card theh lut vek turin an hriattir a. Ram dan leh vengchhung dan an zawm tura hriattirin an zawm lo a nih chuan an chungah eng ang rorelna pawh thleng se an sawibuai thei dawn lo a ni.
Raltlan awmhmun sawn turte chuan an awmna hmasa YMA Branch an hriattir hnuah, Branch hruaituten an insawnna tur Branch-ah ziakin hriattir tur a ni a. Raltlan ten a hranpaa kohhran din a rem lo va, a awmsa an bel mai turin an hriattir a, chibil pawl pawh din phal a ni lo bawk.
Branch tinin raltlante chhinchhiahna inangtlang neih tur a ni a. Thla thum danah mahni huam chhunga raltlan neih zat report thin tur tur a ni a, raltlan te sorkar leh khawtlang duh loh thil (ruihhlo leh thil dang) lakah an inhnamhnawih lo turin an hriattir a, inhnamhnawih man an nih chuan jail-a dah an nih pawhin hremna an tawrh zawh hnuah thawn haw an ni a ni dawn a. Ruihhlo hmanga sumdawnnaa inhnamhnawih roreltute hnen thleng kher lo pawh anmahni khaw lamah thawn haw an ni dawn bawk a, an thlalak leh an hming social media-ah an puangzar dawn bawk a ni.
Sub-Headquarters YMA, Champhai huam chhungah sorkar atanga phalna lak ngai chi sumdawnna reng reng raltlan ten an kalpui an remti lo a, in hmun lo ram an neih phal a ni lo va, lo nei an awm hriat a nih pawhin an neih loh na tura SYMA Champhaiah rawt chuan hma a la dawn bawk a, tul leh pawimawh a awm a nih loh chuan zan lamah pawn chhuak tam lo turin raltlante chu an hriattir bawk.
Raltlante chu anmahni puala lirthei hmanga sumdawnna kalpui phalsak an ni lo a, raltlan chhiattawk an awmin an awmna vengah vui tur a nih chuan mikhual vuia vui tur a ni ang a, chhiatni fund erawh chu an khawn dawn thung a ni.