Mizoram Legislative Assembly member Lalrintluanga Sailo, Dampa bialtu MLA chu nimin khan Luangmuala an chenna inah vui liam a ni a. Vuina official programme-ah House Leader Lalduhoma, Chief Minister; Deputy Speaker Lalfamkima leh Leader of Opposition Lalchhandama Ralte ten thu an sawi.
Chief minister chuan ZPM Legislature Party leh house leader a nihnain thu sawiin, Lalrintluanga Sailo hi legislator tha, debater ropui tak a nih thu a sawi a. A nau, kum 1993-a Bilkhawthlir biala a dina a campaign chairman a nih tluan zak thu a sawi a. Session-ah mi inhal tak emaw an tih chu a ni lo va, an innel em em zawk tih a sawi a. A kalsan tak a chhungte chu thlaphang lo tura chahin sorkarin a tih theih apiang a tih tur thu a sawi.
Leader of Opposition Lalchhandama Ralte chuan Lalrintluanga Sailo chu MNF legislature party deputy leader a nih thu a sawi a. MNF party chhungah leh party dang an thiante nena an inpawhtawnna kawngah a thawhhlawk hle tih a sawi.
Deputy Speaker Lalfamkima chuan, “Pu Lalrintluanga Sailo chu pa tha tak, mite khawngaih thei tak, nelawm tak a ni. Ram tana a thahnemngaihnate kan hre reng dawn a, a tel lova assembly house kan han kalpui tur hi ka huphurh hle,” a ti a. Delhi-a cham mek, Speaker Lalbiakzama’n a rawn thlahna thuchah a sawi bawk.
MNF party president, chief minister hlui, Zoramthanga pawhin thu sawiin, Dampa bialtu MLA vuina hun hman a ni ta mai chu mumang emaw tih mai tur a nih thu a sawi a. Hun rei tak atangin a hriselna a tlahniam tih sawiin, hetihrual hian mi chhel tak, a theih loh tura ngaih pawh a duty leh a zinna tura ruat te ti hlawhtling zel mi leh party tana mi rinawm, entawntlak leh party member te fuihna atan pawha a hman thin a nih thu a sawi.
MLA ni lai a nih angin Lalthangmawia, Addl. Secretary, Mizoram Assembly Secretariat chuan Mizoram sorkarin Lalrintluanga Sailo a sunna Gazette a chhiar chhuak a. House-a a thusawi zatte a sawi lang bawk.