December 3, 1948 ah khan England rama Birmingham khuaah John Michael Osbourne a piang a, a naupan laiin ‘Ozzy’ tiin an ko thin a, he hming hi a pu hlen ta a ni.
Sikul a kal lai hian thil chhiar lamah harsatna a nei a, harsatna a tawh phah thin a. Hei bakah sikulah hian tihduhdah a tuar nasa hle a. Rawlthar a nih lai hian mahni intihhlum a tum hial a, a hnuah amah hian rilru lama harsatna a neih thu a sawi nghe nghe.
Kum 15 a nihin Ozzy chuan sikul a chhuahsan a, hna remchang apiang a thawk chho a, sa talhnaah te pawh a thawk hman a. Thawmhnaw dawr rawk vangin kar 6 chhung chu tan inah an khung a ni.
The Beatles kha a ngaisang thei hle a, an hla ‘She Loves You’ vang khan rimawi khawvelah a zuan luh ve phah hial a. 1968 ah khan Black Sabbath singer niin, an band hi heavy metal hmuchhuaktu tia khawvel hriat lar an ni.
1970 ah an album hmasa ber an tichhuak a, he mi kum vekah hian Paranoid an tichhuak zui a. Khatih laia Black Sabbath manager Don Arden fanu Sharon Arden nen an intawng a, a tirah chuan Ozzy hian a cho phak niin a ngai lo.
1979 ah Ozzy chu a tal buai em mai tiin Black Sabbath chuan an ban a, Randy Rhoads nen inkawpin 1980 ah khan Blizzard of Ozz an tichhuak zui zat a. He album hi an siam fuh bawk a, a zinkawng a thlak danglam chiang hle a. An hla pakhat ‘Crazy Train’ chu tun thlengin khawvela rock hla lar ber pawl a ni reng mai a ni.
1982 ah Randy Rhoads chu thlawhna chesualah a thi a, Ozzy chuan a tuar na hle a. Indawm kun reng loin a zinkawng a zawh chhunzawm zel a, 1983 ah khan Bark at the Moon a tichhuak a. The Ultimate Sin chu a album siam tawh zinga thleng sang ber a ni chho a ni.
1981 ah khan an inhmuhkhawmnaah thuro lu a seh bung a, 1982 ah khan stage-a an inlan laiin bak lu a seh bung bawk a, he mi tumah hi chuan hri a kai loh nan a inchiu phah a. Alamo-ah tum loh deuhin thawmhnaw ha chungin a zung palh a, San Antonio ah pawh kal an phal lo a, kum 10 hnuah erawh an ngaidam ve leh tho.
1991 ah a hla lar leh a dam laia a sak hnuhnun ber ni ta ‘Mama, I’m Coming Home’ tih telna No More Tears a tichhuak a. 1992 ah khan a vawi khatna atan chawlh a puang.
1994 ah I Don’t Want to Change the World vangin Grammy a dawng a, 1995 ah khan Ozzmosis a tichhuak a, double platinum a ni phak a. 1996 ah Sharon nen Ozzfest tour an buatsaih tan a, an tifuh hle. A che fuh chho bawk a, album hralhna vel atangin $50 million a la lut tling hial.
2002 ah khan The Osbournes reality show vangin an chhungkua an lar thar hle a. A fanu Kelly nen 2003 ah khan ‘Changes’ an sa dun a, hei hi UK ah No. 1 a ni thei a, UK No. 1 a nih theih hmasak ber a ni nghe nghe.
2006 ah khan Black Sabbath angin Rock & Roll Hall of Fame ah an la lut a, 2024 ah khan mi mal anga lak luh a ni leh bawk a. UK Music Hall of Fame ah vawi hnih an la lut a, Hollywood Walk of Fame leh Birmingham Walk of Stars ah pawh a hming a tel ve ve a. 2015 ah khan Ivor Novello Lifetime Achievement Award a dawng a. 2021 ah khan WWE Hall of Fame ah pawh lak luh a ni ve tlat.
2019 atangin Parkinson’s disease in a tibuai tan a, 2020 ah khan hei hi a puangzar chauh a ni.
A taksaah tattoo chi hrang hrang 15 a chhuttir a, a kutzungtanga hriau leh pencil chhungmu hmanga OZZY tih a chhut chu a lar ber pawl a ni.
Rimawi lampang zir miah si loin heavy metal khawvelah a thawh hlawk em em mai a, a concert hnuhnung ber ‘Back to the Beginning’ zawh fel hnu lawk, July 22, 2025 ah khan a chawl hahdam ta a. He leiah amah chu awm tawh lo mah se a hming chu a dai tawh hauh lo ang.