Lirtheia eizawng pawl hrang hrangin thuchhuah intawm siamin, tun thla chhunga Mizoram châk lak luhna kawngpuite tlan nuam tawk taka siam an phut tih an sawi a. Hun tiam chhunga an harsatnate phuhru tura kawng hi siam a nih loh chuan an thiam dan anga hma lak an tum thu an sawi.
Thawhlehnia RD Conference Hall, Aizawl-a thukhawm Mizorama lirtheia eizawng pawl hrang hrangte chuan, National Highway No. 306 (Sairang to Kawnpui), National Highway No. 06 (Sairang to Buichali), National Highway No. 108 (Sairang to Langkaih), National Highway No 6 (Kolasib to Bairabi) kawng te hi lirthei tan a zawh hlauhawm khawp a chhia hi pawi an tih thu leh lungchhiathlak an tih thu an sawi a. Heng kawngpuite hi NHIDCL leh Mizoram sorkar hian July 23 – 30, 2025 inkar hian tlan nuam tawk tak a an siam an phut tih sawiin, hemi hun chhung a an harsatnate phuhru tura kawng hi siam a nih loh chuan an thiam dan ang angin hma an la a nih pawhin an mawhphurhnaa nih loh tur thu an sawi.
Lirthei hmanga eizawngte kawng chhiat vanga loan rul thei lo tam tak an awm tawh avangin, NHIDCL leh Mizoram sorkar an ngiatna hi mipuiin hriatthiampui tur leh thlawp tlat turin an sawm nghal bawk.