Aizawl: India rama sorkar damdawi in tha bik tehnaah Mizoram chhunga Primary Health Centre pali – South Vanlaiphai PHC, Sairang PHC, Bunghmun South PHC, leh Kawrtethawveng PHC te an tel thar.
National Health Mission Director Dr. Lily Chhakchhuak hnen atanga thu dawn danin, India rama sorkar damdawi in tha bik tehna, National Quality Assurance Standards (NQAS)-ah South Vanlaiphai PHC, Sairang PHC, Bunghmun South PHC, leh Kawrtethawveng PHC te chu an tling thar a, a tehnaah 93.07%, 94.64%, 93.21% leh 92.44% te an hmu.
PHC zingah NQAS National Certificate hmu hi 26 an awm ta a ni.
Heti hian Mizoram chhunga sorkar damdawi in 36 te chu NQAS national certificate nei tawh an ni a. Tunah hian sorkar damdawi in 21-in state level certificate nei tawhin national certificate result nghak mek pali an awm bawk.
Health Minister Lalrinpuii chuan, India rama damdawi in tha bik thlan chhuah zingah Mizorama damdawi in a awm belh zel chu Mizoram tan mellung pawimawh tak a nih thu leh damdawi in, district leh state-a thawktu zawng zawng te thawhrimna leh taimakna chhuanawm a tih thu a sawi a. He’ng tehna te hi sorkar damdawi in pantu damlote chu a chhawr tangkai bertu tur an nih thu a sawi.